As obras da Alameda reinícianse mañán despois da parada polas festas da Peregrina

REDACCIÓN - PONTEVEDRA As máquinas volven este luns á Alameda de Pontevedra unha vez rematado o período de paralización decretado pola alcaldesa en funcións, Teresa Casal García, para acoller neste céntrico espazo o recinto das festas da Peregrina.
O decreto abranguía as datas comprendidas entre o 1 e o 21 de agosto, pero ao coincidir esta data en venres optouse por agardar ata o luns, día 24. A empresa comezará ese día a tomar as xuntas do muro que delimita a rúa Alameda.
A continuación empezarán coas aperturas de gabias para a instalación soterrada dos servizos de electricidade, auga e saneamento. Unha vez que o espazo conte con estes novos servizos quedarán definitivamente garantidas as condicións de seguridade e hixiene durante as festas. A nivelación da superficie e a aplicación dunha última capa de xabre dará o acabado final en superficie.
Bancos e lousas de pedra
Unha vez completada a instalación de servizos volverán colocarse as dúas fileiras de bancos axeitadamente restaurados e desenvolveranse o resto de actuacións previstas no proxecto. A planificación pasa por acelerar o ritmo para intentar que todo estea concluído cara finais deste ano, dado que as obras están incluídas dentro do Plan E do Goberno de España.
A construtora está a espera da chegada das lousas de pedra para pavimentar con este material a rúa da Alameda, onde xa están instalados os servizos e formigonada a superficie.
Ten previsto tamén proceder a unha limpeza e repintado xeral, recuperando a cor orixinal, no Palco da Música.
Iluminación
A substitución completa do obsoleto sistema de iluminación, coa colocación de novos farois e a restauración dos vintetrés azulexos costumbristas de Carlos Sobrino na cabeceira sur, do recinto da Alameda onde tamén se realizarán outras actuacións como a restauración das escalinatas, son outras das actuacións que completan o exhaustivo proxecto de reforma.
As obras, que abranguen unha superficie de 1.350 metros cadrados, están adxudicadas por importe de 811.882,77 euros a "Construcciones Varela Villamor".
Sinalización
A empresa ofertou melloras valoradas en 86.715,40 euros, que inclúen a catalogación das especies vexetais e a sinalización destas especies, así como un estudo botánico e sanitario; redacción dun proxecto histórico e de restauración complementario ao previsto no proxecto e, finalmente, elaboración dunha publicación de ata 200 páxinas en papel fotográfico a cor e cun número mínimo de 300 exemplares que servirá como material promocional deste espazo.