X.M. del Caño / OURENSE
A escritora Carmen Blanco sacou á rúa o libro de ensaio Sexo e lugar, no que analiza factores coma o poder, a cultura, o arte e a literatura, partindo dunha postura de "vivencia libre do sexo e do lugar". A propia autora confesa que pretende "combatir cos seus ensaios o poder sexual e o poder colonial".
- Vostede analiza neste libro o papel que representa "o sexo" e "o lugar" na obra de varios autores ourensanos, como Ramón Otero Pedrayo.
- Otero Pedrayo é unha figura moi interesante para a construcción da galeguidade, onde deixa ver a idea que ten do sexo e dos sexos. Eu analizo a obra Arredor de si, na que recrea o mito de Penálope e Ulises. Identifica a Galicia con Penélope. Insiste na atracción das nais, que identifica coa terra; identifica nai e terra con Penélope e con Ítaca. Aparece nel a muller amante, Calipso, que é unha atracción que se pode seguir nun momento dado, pero ó cabo hai que abandonar á amante estranxeira para volver ó amor da nai e da terra. Esa é a idea xeral que expón Arredor de si.
- Establece un paralelismo fermoso.
- É unha construcción preciosa, pero resulta un pouco problemática, no sentido en que o sexo non aparece coma unha opción definitiva, senón transitoria, e non aparece como algo esencial na vida do ser humano.
- Otero Pedrayo mostra na súa obra que é un tanto conservador e moi católico.
- Exactamente, trátase dun home conservador e católico, no fondo, pero tamén aberto, liberal e nacionalista.
- Tamén aflora a súa faceta de erudito nese libro.
- Arredor de si recrea toda a historia de Galicia e a historia da cultura occidental.
- Otero introduce certas cautelas na súa obra ante o sexo, contrariamente ó que fai outro autor ourensano, como Blanco Amor.
- Son mundos diferentes, pero hai que dicir que na obra de Otero Pedrayo hai moita sensualidade.
- ¿Como trata o sexo e o lugar José Ángel Valente?
- Neste libro analizo as Cántigas de alén de Valente, no que destaca o tratamento que fai do lugar. Presenta unha visión profundamente liberada da vivencia da terra, do lugar e de tódolos lugares. Hai unha recreación libertaria do tema da terra e do tema do espacio e do lugar. En Valente aparece unha vivencia integral do amor e do erotismo, tamén sempre nun sentido libertario e liberador. Ten unha poesía profundamente filosófica, na que hai unha vivencia moi liberadora e profundamente integral do amor e do erotismo, do sexo e do amor, do corpo e da mente, ó mesmo tempo, do ser humano.
- Reflicte unha etapa concreta da súa vida.
- En Cántigas de alén aparecen as vivencias do seu último amor e definitivo.
- Que ten nome propio.
- Claro, sabemos que é Coral Valente. Analizando o conxunto da súa obra, vese que o sexo foi importante para Valente e sempre está relacionado co máis profundo do seu ser, como é lóxico, porque é unha vivencia humana esencial. Valente e un poeta profundo, polo que os temas do amor e do sexo están moi presentes na súa obra.
- Tamén analiza a obra de Xohana Torres, unha escritora que recibiu o premio "Celanova, Casa dos Poetas".
- Xohana Torres resalta a vida da nación, unha nación na que están moi presentes as mulleres. E tamén se estudian outras mulleres máis novas, como a poeta Olga Novo, na que hai unha recreación profundamente liberalizadora do sexo.
- Case provocadora.
- É entusiasta a favor do amor libre.
AUMENTAR TEXTO »
REDUCIR TEXTO »
