J.FRAIZ - OURENSE
Estamos en crise. En Ourense o malestar da economía envurúllase de xeito tal que a fai ser “permanente” segundo cre Etelvino Blanco, secretario comarcal da CIG. Leva unha xeira de 33 anos na acción sindical entendida desde o prisma do nacionalismo e a observancia dos salarios e o emprego. Con 4 anos por diante de xestión, esixe a implicación das institucións para facilitar a dialéctica obreiro-empresariado.
–Sae reelixido líder dunha executiva chea de caras novas. ¿Houbo reticencias para formar lista no medio da crise?
–A executiva é froito do consenso e representa plenamente ó conxunto dos afiliados. Neste momento, a xente da CIG non ten interese en fomentar liortas estériles, senón en fomentar a unión da organización, porque así haberá tamén máis capacidade de presión.
–¿Evolucionará cara arriba ou á baixa a situación económica de Ourense nos próximos 4 anos?
– Aínda que haxa melloras e se chegue a non destuír emprego, a provincia está nunha situación de crise permanente que vai perdurar durante moito tempo mentres non muden os plantexamentos con esta provincia.
–¿Continuarán logo a medrar como no último ano os expedientes de regulación de emprego, ou os concursos de acreedores?
–Esperemos que neste ano non se acade o nivel de 2009 (1.219 traballadores estiveron inmersos en 57 procesos de ERE) porque sería unha auténtica catástrofe. Pero preocupámonos por un dato: hai empresas que aínda non solucionaron os expedientes de regulación, con traballadores que agora están en suspensión temporal pero poderían perder os seus postos.
–¿Vai mudar neste senso a acción do seu sindicato?
–A nosa acción sindical debe estar marcada pola esixencia e a presión sobre as institucións para que adopten unha política preferente con respecto a Ourense.
–¿Á medida de plans estratéxicos como o Impulsa Ourense prometido pola Xunta?
–Basta xa de proxectos para Ourense, que tampouco precisa medidas de carácter xeral. Hai que profundizar a nivel estructural, con políticas activas no sector primeiro, na construcción ou primando o desenvolvemento da industria.
–¿O novo fondo estatal de emprego do Plan E, é algo máis ca un paliativo?
–Sobre iso necesitamos información e, de feito, imos pedir dacordo coas outras centrais sindicais que nos informen sobre o novo plan, no que teña que ver cos cartos que se van invertir e tamén no emprego que se pensa crear. De momento, estannos ocultando toda esa información.
–¿As dificultades marcarán a relación co outro actor, o empresariado?
–Estaremos vixiantes, porque os empresarios van seguir aproveitando a actual situación nos próximos meses. Moitos deles usan o paraugas da crise para aumentar os seus beneficios, desfacéndose de parte da plantilla ou con suspensións temporais de emprego.
–¿Que postura vai ter a comarcal ourensana ante o borrador do galego?
–Como central nacionalista que somos, a defensa da identidade e o idioma é nosa reivindicación. O día 21 de xaneiro estaremos en Santiago movilizándonos a prol do galego.
