K.R. - OURENSE
Ourense acollerá o reestreo da adaptación teatral de A Esmorga, unha creación de Sarabela Teatro en torno á obra cumio de Eduardo Blanco Amor, que será a primeira experiencia dun proxecto pioneiro en Galicia consistente na conversión de Sarabela en compañía residente da cidade, na que o auditorio constituirá esta residencia.
Na práctica, este modelo de política teatral significa o amparo das institucións municipais de cara á produción, co cal tamén se persegue chegar a un teatro menos taquilleiro, que xere emprego estable e potencie a vida teatral da cidade, así coma un contacto máis fluído cos espectadores.
Isabel Pérez, concelleira de cultura, mostrou a súa fonda satisfacción coa posta en marcha deste proxecto, que provén dunha reclamación histórica, e afirmou que a iniciativa "fai cidade, pero ten vontade de chegar ó mundo enteiro".
Pola súa banda, a directora da compañía Sarabela, Ánxeles Cuña, afirmou que "se nos presenta unha gran oportunidade despois de 29 anos de condicións bastante precarias".
Deste xeito, "poderanse levar a cabo obras de mellor calidade", ó contar cun espazo privilexiado coma o auditorio para difundir as obras de cara ó publico, pero tamén para crealas, como puntualizou Ánxeles Cuña, pois o edificio ourensán será o seu lugar de ensaio.
Esta nova forma de xestión teatral arranca en Ourense co apoio da Concellaría de Cultura, que achega 75.000 euros; así coma da AGADIC, que contribúe ó proxecto con 80.000 euros.
Isto obriga a facer un total de 36 funcións á compañía no municipio, das que a primeira será A Esmorga, que se estreará o vindeiro día 18 de setembro e estará en cartel ata o día 30.
O Xefe Territorial da Consellería de Cultura en Ourense, Gerardo Pumar, afirmou que este proxecto axudará a "mellorar a vida cultural da cidade", e falou de Sarabela coma "a mellor compañía de teatro da cidade", ó tempo que felicitou á compañía polos seus trinta anos de traxectoria.
22:34
IMPRIMIR PÁGINA »
