Barreiro repróchalle a Feijóo que rompera a "tranquilidade social" en materia lingüística

X.M. DEL CAÑO - OURENSE O presidente da Real Academia Galega, Xosé Ramón Barreiro Fernández, reprochoulle onte en Celanova ó presidente da Xunta, Alberto Núñez Feijóo, que rompera a "tranquilidade social" en materia lingüística, por rebaixar a utilización do galego no ensino, no acceso á función pública e na promoción comercial. Núñez Feijóo, que non se deu por aludido durante o discurso de peche que pronunciou no acto de entrega do premio da Fundación Curros Enríquez á Academia, declarou a Faro: "Eu comparto a defensa do galego. Ningún presidente da Xunta pode non compartir a defensa e a promoción do idioma propio de Galicia".

Máis alá da polémica, Núñez Feijóo recoñece que a Real Academia "é a memoria do galego, é a memoria do idioma. Sen a Real Academia, o galego non tería a vixencia, o agarimo e a puxanza que tén. Polo tanto, calquera premio que se lle dá á Real Academia, é un premio que se lle dá a Galicia".

Pola súa parte, na súa intervención no acto de entrega do premio que se celebrou onte no salón do claustro barroco do mosteiro de Celanova, Xosé Ramón Barreiro advertiulle ó presidente da Xunta que a Real Academia Galega "non foi quen removeu as augas". Polo tanto, explicou que el non podía "desaproveitar a oportunidade" para deixar claro que a entidade que representa "non pode gardar silencio sempre, nin mirar para outra parte".

Barreiro Fernández recriminoulle ó presidente da Xunta que tomara decisións e fixera decretos que afectan á lingua e ó idioma. "Fixéronse de costas á Real Academia, sen buscar o consenso", tendo en conta que, "por norma, é a responsable do coidado da lingua galega". E recoñeceu que ese tipo de comportamento, por parte do Goberno galego, "xera unha situación de desasosego, de nerviosismo".

O presidente da Real Academia resaltou que o tema lingüístico "parecía definitivamente asentado". Polo que, pese a que dixo que non pretendía dar leccións, lembrou que "a primeira obriga que teñen os poderes públicos é fomentar o sosego, a paz e a tranquilidade social e non crear problemas, sobre estes puntos ou sobre outros". E recoñeceu: "Eu non son quen de dicirlle ó poder público como ten que facer as cousas, pero como representante dunha institución que ten a responsabilidade do idioma, si teño que falar. E comprenderán vostedes que teño que aproveitar os poucos púlpitos que ó presidente da Real Academia Galega agora se lle ofrecen".

Xosé Ramón Barreiro Fernández lembrou que o día 25 de xullo se celebra en Santiago "un acto, que podiamos chamar un rito contaxionista". E engadiu: "Alí van miles de persoas a tocar o Apóstolo, para que lle comunique algo das súas virtudes. Eu veño aquí hoxe a Celanova con ese mesmo obxectivo, para que de Celanova, que aínda conserva a quentura da presenza, da vida, das virtudes do gran poeta Curros Enríquez, se nos comunique algo desas virtudes. E eu, a este santo laico, lle pido que sigamos sendo rebeldes como el foi, que sigamos sendo rebeldes para loitar pola liberdade e pola democracia, e pola cultura galega, unha cultura que sen a lingua é ou aparece desmembrada".

O presidente da Real Academia Galega sostén que "todos os políticos, intelectuais e o pobo, temos a obriga de transmitirlle a nosa cultura íntegra ás novas xeracións, sen minorizala, sen rebaixala, e transmitir unha cultura significa transmitir unha lingua, que é a medula dunha cultura". E aseverou: "Isto é o que lle pido ás autoridades aquí presentes, que non se fagan problemas co idioma".

Despois de agradecer a concesión do premio Celanova Casa dos Poetas á Real Academia Galega, Xosé Ramón Barreiro recoñeceu que "se fora prudente, debería rematar aquí", sen facer alusión ó conflicto lingüístico que enfronta á entidade que preside co Executivo galego. E engadiu: "Pero debe ser cos anos, coa vellez, que un se vai facendo un pouco imprudente".