Castrelo do Val acollerá a X Festa de Homenaxe ós Carrilanos galegos

REDACCIÓN - OURENSE O Concello de Castrelo do Val, xunto coa Asociación Cultural Os Carrilanos organizan a X Festa de Homenaxe ós Carrilanos. O acto, que consistirá nunha ofrenda e intervencións dos organizadores, terá lugar este domingo á unha e media do mediodía, en Campobecerros, fronte ó monolito que se ergueu na honra destes traballadores, para acto seguido desfrutar dun xantar de confraternidade ás tres no pobo de Pepín.
Este evento leva celebrándose dende o ano 2000, para recuperar a memoria destes traballadores, que construíron o ferrocarril cara á meseta, unha das obras civís máis destacadas do século XX.

Padecían “o mal da via”

A vida destes traballadores non foi fácil, xa que padecían enfermidades derivadas do seu traballo, coma a silicose, tamén chamado “o mal da via”, consistente en fibrose nos pulmóns e dificultades para respirar derivadas da inhalación prolongada de compostos químicos que conteñen sílice cristalina, que en moitas ocasións provocaba a morte.
A asociación cultural Os Carrilanos lembra que é obrigatorio acordarse destes traballadores que foron heroes do século pasado, ó conectar Castela con Galicia.
Esta obra, complexísima pola dificultade que plantexaba a orografía do terreo, comezouse a plantexar nos anos setenta do século XIX, pero non se comezou a construír ata a chegada da ditadura de Primo de Rivera, erematouse nos anos cincuenta xa en plena época franquista.
O presidente da Asociación de Carrilanos, Xosé Barxa, afirmou tamén que a asociación loitará para que coa chegada do AVE “se manteñan os trens de cercanía e se mellore o servizo”, pois o servizo público non ten que ser só rendible económicamente, senón tamén socialmente