A Fundación Otero Pedrayo retrasa a colocación do neto do ´Irmanciño´ por aparición de fungos no xardín

X. M. DEL CAÑO - OURENSE

A xunta directiva da Fundación Otero Pedrayo localizou ó neto do “Irmanciño”, un pinsapo de pouco máis de medio metro, criado nunha maceta a partir dun brote da árbore que rachou un temporal no pasado mes de xaneiro, pero de momento non pode plantalo pola proliferación de fungos na maior parte das especies arbóreas do Pazo Museo de Trasalba.

O presidente da Fundación, Víctor Fernández Freixanes, explica que un equipo técnico do Centro de Investigacións Forestais de Lourizán “terá que estudar e tratar o problema”, dado que o anterior pinsapo, que caeu en xaneiro, estaba “furado polo medio, polo deterioro que sufriu con esa enfermidade”.

Fernández Freixanes mostra a súa preocupación pola proliferación de fungos, despois de que Carlos Dacal “levantara a lebre”. Sostén que poden estar “tocadas” as laranxeiras que plantou o avó de Otero e outras árbores. E isto tamén retrasa a restauración do xardín romántico do pazo que se vai acometer.

A profesora Susana Reboreda explica que Xosé Antonio, o secretario da delegación da Consellería de Cultura en Ourense, ofreceulle á Fundación Otero Pedrayo a posibilidade de plantar o neto do “Irmanciño”, para repoñer o pinsapo derrubado. Procede dun brote que levou para a súa casa, con permiso dos patróns, que tivo nunha maceta ata hai un ano. Rematou plantándoo nun terreo próximo, no mesmo pobo de Trasalba. Membros da Fundación foron ver o exemplar, “porque tiñamos dúbidas de que fora un pinsapo, e descubrimos, con asombro, o neto do ‘Irmanciño’. Ten pouco máis de medio metro e o tronco algo groso, porque o tivo moito tempo metido nunha maceta”.

Un viveiro de Andalucía ofreceulle á Fundación Otero Pedrayo tres ou catro exemplares de pinsapo, de forma gratuíta, para repoñer o “Irmanciño”, despois de coñecer a noticia de que un temporal o botara abaixo. Pero decantáronse porque ocupara o seu lugar “o neto do Irmanciño, polo valor sentimental que ten”.