A Concellería de Cultura de Bueu e a Asociación Amigos de Johán Carballeira celebran hoxe os actos de entrega dos premios de poesía e xornalismo que levan o nome do antigo alcalde de Bueu, do que se acaba de cumprir o 80 cabodano do seu fusilamento. A entrega do galardón de xornalismo será a partir das 12.00 horas na sala Amalia Domínguez Búa, nun acto organizado pola Concellería de Normalización Lingüística e no que se debatirá ao redor do tratamento que se lle da nos medios de comunicación ás mulleres. Intervirá a editora Llerena Perozo, que a través de recortes e artigos de prensa fomentará o coloquio cos asistentes. Ao rematar entregarase o premio de xornalismo, que este ano comparten Montse Dopico e María Obelleiro.
Xa pola tarde será a entrega do vixésimo premio Johán Carballeira de poesía, que este ano é para a lucense María Reimóndez polo poemario "Galicia en bus". Ao igual que nos anos precedentes será durante a celebración do sexto festival poético organizado xunto á Asociación Ricardo Gómez Buceta.
O acto será a partir das 19.00 horas no Centro Social do Mar e estarán presentes Daniel Costas, Xosé María Álvarez Caccamo e Pura Tejelo, que foi a gañadora do premio de poesía do ano pasado. De feito este festival servirá para a presentación en sociedade do seu poemario, "A elgancia do século". O festival complétase coa actuación do cuarteto Staccato da Banda de Música Artística de Bueu.
