08 de mayo de 2017
08.05.2017

A seca e a defensa da lingua protagonizan a Festa do Muíño

Coiro pecha as 28º Xornadas Culturais no Muíño de Fausto co pregón de Luís O Caruncho, música popular e degustación de produtos tradicionais

08.05.2017 | 17:49

"Se teño que ir ao muíño/ vou ao muíño de Fausto/ que non me cobra a maquía/ e a moer non dou abasto". Con estes catro versos, que animou a entonar aos espectadores que colmaban o recinto, Luis O Caruncho abriu o pregón na xornada central arredor do emblemático muíño de Coiro nunha festa que leva preto de tres décadas defendendo o oficio e cultura propias. O pregoeiro fixo un chamamento a usar e defender a lingua galega, lembrouse das nais como transmisoras deses saberes e entonou algunhas cantigas nas que os muíños son protagonistas destacados.

"O muíño é especial, e ao pasar por el penso en todas as cousas que no muíño deberon acontecer, tódolos contos que o muíño debe saber, tódalas cantigas que se cantaron baixo as súas tellas, tódalas conversas das que o muíño foi testemuña", debullou Luís O Caruncho, mentres o rodicio do muíño de Fausto xiraba e facía mover a moa grazas a un sistema de bombeo habilitado por Protección Civil para recuperar a auga curso abaixo, pois a seca que se está a padecer esta primavera deixou o regato sen caudal suficiente para cumprir ese cometido. "Con estas condicións, mesmo tiveron que traer fariña milla de fóra", apuntaban uns veteranos visitantes sinalando uns sacos de papel estibados sobre o antigo camastro no interior da acea.

O Caruncho aproveitou a estancia en Coiro para lembrar que xa fixera antes moitas tarefas no recinto, como visitante, gaiteiro, regueifeiro, zanfoneiro, tamborileiro, requinteiro e, agora, pregoeiro. Mesmo se atreveu a pedir choio no mantemento do contorno, que louvou como "lugar máxico e único, cheo da nosa vexetación máis autóctona e senlleira, grazas á sensibilidade e cariño de quen mima este lugar ano tras ano". Tamén referiu algúns dos topónimos que pobran a xeografía galega dando testemuña da importancia histórica, económica e social, que os muíños acadaron no seu día. "Por iso é tan necesario que se fagan festas coma esta, onde se lle rinda homenaxe a algo tan importante coma o muíño; festas onde se reafirme a nosa identidade como pobo. Onde parolemos, bailemos, protestemos, riamos, comamos, bebamos, esteamos xuntos. Onde vexamos continuar a roda da vida como a roda do muíño, co que nos trae e co que nos leva", culminou o pregoeiro, que non esqueceu facer un chamamento á defensa do oficio e da lingua galega, o papel das nais (onte era o seu día) e a desterrar actitudes machistas, antes de que a organización repartira agasallos aos colaboradores e a banda de gaitas Tromentelo interpretara o himno galego co acompañamento de parte do público.

A esas alturas, co reloxio achegándose ás dúas da tarde, o apetito xa se deixaba sentir entre o público que foi colmando o recinto conforme avanzaba a mañá. Empanadas de millo en distintas variedades, tapas de mexilóns, chourizos, ovos con migas e outras delicias gastronómicas propias das terras do Morrazo, regadas con xerras de viño, completaban unha festa dos sentidos na que tamén participou a artista Henrique Prado, que sementou o cunha exposición de singulares esculturas o espazo habilitado como merendero. Pola tarde, e co sol acompañando, o grupo de pandereteiras Lagharteiras e de folc Diese puxeron música popular a esta tradicional celebración.

Compartir en Twitter
Compartir en Facebook
 

Calendario laboral y escolar 2017/2018

Calendario laboral 2018 en Galicia

Calendario Laboral 2018 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2017/2018 .

 

Enlaces recomendados: Premios Cine