G.M.P. - CANGAS
O 99% dos pais, nais ou titores dos alumnos do María Soliño xa reciben calquera información deles a través do teléfono móbil, e un tercio faino a través do correo electrónico. Así, as faltas de asistencia á clase, as calificacións escolares, a expulsión da aula ou calquera incidencia relevante pode ser consultada a través do ordenador, es esta será practicamente en tempo real cando se xeralice a través da páxina web, gracias a unha clave persoal de acceso. E é só un exemplo de por donde avanzan as novas tecnoloxías, neste caso aplicadas á ensinanza e á xestión dos centros educativos.
Pero o proxecto TIC (Tecnoloxías de Información e Comunicación) é máis amplo, e o IES María Soliño vai na proa, formando parte da rede de centros de Galicia pioneiros neste proceso, do que están á cabeza os profesores Ana Salorio, Gloria Suárez e Xosé Martínez, que se encargan da coordinación, a aula virtual e a actualización da páxina web. Na práctica, mestres e alumnos poden comunicarse máis alá da aula física, preguntarse mutuamente, continuar na casa os traballos que se inician no instituto, coordinarse para traballar en rede ou consultarse dúbidas sen necesidade de desprazamento físico nin perda de tempo. Un proxecto de innovación educativa que é ben recibido polo alumnado, máis familiarizado co mundo virtual e cunha sociedade cambiante e de avances vertixinosos.
A maiores, a participación no programa TIC dalle ao instituto outras vantaxes, como unha mellor dotación e xestión dos equipos informáticos, a incorporación de software gratuíto que lle permite prescindir de programas que con frecuencia son "pirateados", e a posibilidade de estar na vangarda da docencia e unha maior cercanía con calquera innovación tecnolóxica.
"As novas tecnoloxías non son unha materia illada, dotan aos seus usuarios dunha maior autonomía de competencia, dunha capacidade transversal básica que debe aplicarse en todos os ámbitos de coñecemento", inciden os responsables do programa TIC, que teñen claro que non facer uso das novas ferramentas é perder o ritmo dos tempos, e a súa utilidade práctica: "Estas tecnoloxías aumentan as posibilidades didácticas do profesorado, permiten un ensino máis personalizado e favorecen o traballo colaborativo".
