Música de Beethoven para celebrar o Nadal no Auditorio

REDACCIÓN / O MORRAZO Cangas non quere ser tanto como Viena e o seu tradicional concerto de aninovo, pero si que quere crear tradición celebrando un concerto navideño de música clásica. Onte no Auditorio estiveron a Orquestra Clásica de Vigo e o Coro do XXV Aniversario, que interpretaron completa a novena sinfonía de Beethoven. Foi nun concerto patrocinado por Caixanova e que rexistrou unha excelente entrada. Ademais, interviñeron como solistas a soprano Estefanía Perdomo, a contralto María José Trullu, o tenor Mikeldi Atxalandabaso e polo baixo Javier Franco Cortés.
Non foi o único concerto que se celebrou onte na comarca. No IES As Barxas tamén houbo lugar para a música cunha actuación da Banda Airiños do Morrazo, que organizou o seu primeiro festival de Nadal e coa intención de consolidar a iniciativa para os vindeiros anos. O repertorio incluiu pezas relacionadas con estas datas e outras vencelladas ó cine, compostas por autores como John Williams ou Ennio Morricone.
Non podía faltar nunha xornada como a de onte a música coral. Foi ademais por partida dobre, cun concerto organizado polo Clube de Xubilados Nosa Señora do Carme de Moaña no templo parroquial e cunha gala benéfica da xunta local de Bueu da Asociación Española contra el Cáncer, que se desenvolveu no Centro Social do Mar.