Os traballadores de Bueu encestan mellor que os políticos

REDACCIÓN / BUEU Políticos e traballadores do Concello de Bueu onte deixaron atrás durante un anaco a rutina do traballo municipal para confraternizar e celebrar xuntos o inicio das festas de Nadal. Ó mediodía tivo lugar o tradicional pincho e pola tarde celebrouse un partido de baloncesto no recén remodelado pavillón deportivo de Beluso, onde os políticos recibiron un merecido repaso por parte dos seus "subordinados".
Pese a crise, o consistorio non renunciou a organizar un pequeno aperitivo no salón de plenos e ó que acudiron gran parte da plantilla municipal [tamén estaban invitados os medios de comunicación]. O alcalde buenense, Félix Juncal, dirixiuse ós traballadores para felicitarlles as festas, pero tamén para pedirlles un pequeno esforzo máis para o vindeiro ano 2010. Logo chegou o momento da papatoria e a maioría dos presentes coincidiu en sinalar que o pincho de onte resultou de máis proveito que o de 2008. Ninguén quixo desprezar a iniciativa do ano pasado, vencellada co comercio xusto, pero o certo é que o aperitivo deste Nadal foi máis farturento.
E despois de consumir tantas calorías, nada mellor que un pouco de exercicio. Había que dar exemplo porque xusto antes no salón de plenos clausurouse a segunda edición do programa Concellos Saudables. Así, pola tarde políticos e traballadores formaron dous equipos para medirse nun partido de baloncesto. No equipo político estaban Félix Juncal, Martín Villanueva, Andrés Lamosa e os concelleiros do PP Manuel Pires e Susana Canosa. A concelleira popular foi a única muller que participou no encontro e non se deixou arredar por tantos homes e puxolle moitas ganas, aínda que se lle notaba que andaba un pouco falta de forma. Tampouco podía faltar o concelleiro de Deportes, Manuel Otero, que demostrou que fai méritos para ostentar o seu cargo. No equipo dos traballadores estaban o adxunto de tesourería, membros da Policía Local, integrantes da Brigada de Obras, o monitor de deportes e incluso o notificador municipal. Eles mostraron algo máis de pericia á hora de encestar e ó final impuxéronse cun marcador final de 30-22. Por un día, mandaron eles.