Fecimo trae a luz navideña... e a neve

REDACCIÓN / O MORRAZO A comarca do Morrazo finalmente tampouco puido fuxir da neve. Aínda que fose artificial. O espectáculo "A luz do Nadal" foi a gran aposta de animación de rúa para estas festas navideñas e como elemento más chamativo incluiu unha gran nevada artificial, algo que fixo as delicias dos máis pequenos. Iso é a presencia de Papá Noel, a quen lle puideron transmitir os seus desexos e peticións para esta Noiteboa.

Na xornada de onte celebráronse dúas funcións. A primeira tivo lugar a mediodía en Cangas e correspondíase a que non se puido realizar o luns a causa do mal tempo. E logo pola tarde chegou o turno de Moaña, que desfrutou deste espectáculo de luz, son e maxia na Alameda da Seara (á altura do lavadoiro de Fontecán).

Os nenos e nenas que se achegaron á Papá Noel recibiron a cambio das súas peticións chocolates, caramelos e demais galdrumadas. Despois foi cando comezou o gran show final, cun enorme boneco de neve e coas "Mama Noel" nun vistoso espectáculo de baile. E para completar a estampa navideña. comezaron a caer as folerpas de neve. Foi grazas á "maxia" empregada por Fecimo, que cuns grandes canóns conseguiu unha nevada artificial. Para que ningún dos cativos se resfriase e pasase unhas malas festas repartironse uns chuvasqueiros, que só podían ser de cor vermello, e que lle deron aínda máis cor.

"Éxito"

Dende Fecimo destacaron que a pesar da meteoroloxía a iniciativa resultou un "éxito" e aseguran que as caras de ilusión dos máis pequenos fan augurar "unhas festas cheas de ledicia".

A federación continúa agora coa súa campaña de Nadal no comercio, no que se reparten boletos para optar a un premio de 10.000 euros e outros 6 de 500 euros.