Volve a Cangas polo Nadal

Hai un ano deron moito que falar, e mañá están dispostos a volver a armala. A asociación de apoio a persoas con discapacidade intelectual Aspamsim celebra mañá, ás sete da tarde no Auditorio de Cangas, o Festival Navideño, que contará con catro actuacións distintas interpretadas polos 30 usuarios de entre dez e 40 anos con que conta na actualidade. Entre risa e risa, presentarase o calendario. "Entre amigos", que tamén se pon a venda, e os organizadores adiantaron que haberá variedade e calidade, e que o cumio chegará cun dúo cómico "moi prometedor".

G.M.P. - CANGAS Os pormenores do festival navideño de Aspamsim é un segredo case tan ben gardado como a fórmula do famoso refresco de cola, pero semella que ten a mesma chispa para a vida. O "carrusel deportivo" do ano pasado deu máis que falar que os partidos do Barça-Madrid, e o adianto desta edición é mais que prometedor, o que augura un éxito de público coas entradas ao módico precio de dous euros. A este paso acabará por instituirse a reventa, auguran os analistas.

A directiva, coa ausencia do presidente, Carlos Sotelo, por motivos laborais, explicou onte as liñas desta edición. Acompañados pola alcaldesa, Clara Millán, e o concelleiro de Benestar, Óliver Álvarez, sinalaron que se trata dun novo proxecto que non só sirve de "trampolín" para que os asociados demostren sobre o escenario as súas cualidades interpretativas, senón que ademais ten un valor terapéutico para os que participan e contribúe á formación como persoas. "Ás veces tendemos a sentir compaixón ou lástima destas persoas, e nós non queremos iso, só que lles deamos unha oportunidade", reivindicou María González, coordinadora de Aspamsim e "unha deusa" para os implicados, segundo a definiu a alcaldesa. Ao seu carón estiveron tamén Ángela Fernández e Serafín Paz, membros da directiva do colectivo.

Asimesmo, o acto servirá para a presentación en sociedade do calendario "Entre amigos" para 2010. A asociación insistou en agradecer a colaboración do Concello de Cangas, da empresa Imaxe Urbá e tamén da perruquería Rasgos, que lles deu a portunidade de "poñerse guapos e sentirse ben nunha experiencia donde todos son tratados como iguais". Ao tempo que sirve para divulgar o seu labor, o almanaque mostra algúns dos lugares máis turísticos das parroquias canguesas, como poden ser o monte do Facho, o Balcón do Rei ou o Muíño de Fausto.

O concelleiro Óliver Álvarez insistiu en ofrecer a colaboración municipal para estas actividades e fixo un chamamento ao vecindario do Morrazo para asistir ao festival de mañá. "O ano pasado rinme moito, e este ano todo indica que non vai ser menos", anunciou Clara Millán.