Cangas convoca o certame de beléns artesanais e fará unha mostra cos presentados

REDACCIÓN - CANGAS A Concellería de Cultura e Educación de Cangas convoca o X Certame de Beléns, unha tradición que se mantén co traballo dos veciños, e na que haberá dúas categorías. Na de beléns artesanais en dimensións reducidas poden participar escolares e asociacións educativas, que deberán inscribirse no departamento de Cultura no Auditorio municipal en horario de nove a dúas. Tamén pode facerse no teléfono 986 304108 ata o 15 de decembro. Os beléns deberán depositarse no lugar que indique a organización os días 21 e 22 de decembro para ser expostos ao público entre 0 23 de decembro e o 6 de xaneiro. As dimensións non poderán exceder de un metro cadrado, e os materiais son libres. Haberá diplomas e lotes de libros para os tres elexidos polo xurado, que valorará a dificultade, orixinalidade e fantasía.

En domicilios

A modalidade B está reservada á instalación de beléns en domicilios particulares, na que poden participar todos os vecinos de Cangas. As dimensións son libres, ao igual que os materiais e figuras. As persoas inscritas deberán permitir a visita ao belén do xurado e das persoas que o demanden, e estar instalados durante as datas navideñas. Haberá diplomas e entradas para o Auditorio para os participantes.