REDACCIÓN - CANGAS
Despois da reunión celebrada o venres pola noite, na que participaron representantes da Xunta de Montes de Darbo, da directiva do Alondras e do Concello de Cangas para acadar un acordo para a cesión e dotación de herba artificial ao campo de Monte Carrasco, o grupo municipal da Alternativa Canguesa de Esquerdas (ACE) considera que a solución ao problema está nas mans do tripartito. Os concelleiros ofrecen "o noso total respaldo a conseguir unha nova infraestructura deportiva en Monte Carrasco deixando claro que deben ser os comuneiros e comuneiras de Darbo quenes teñan a última palabra".
"Despois da racionalidade mostrada pola Xunta de Montes e o Alondras, o Concello ten a obriga de dar todos os pasos ao seu alcance para chegar a un acordo irrenunciable e que está nas nosas mans conseguilo se hai un mínimo de diálogo", manifestan o grupo dos concelleiros Mariano Abalo, Xosé Manuel Pazos e Maruchi Álvarez, que botan moito en falta a actitude de dialogo, pero que "estamos obrigados a contribuir a recuperalo, e dende logo dende ACE faremos as xestións necesarias para que todalas partes queden satisfeitas cun acordo que debe ser froito do consenso", recalcan.
Charla sobre os recheos
Por outra banda, desde ACE animan a participar na charla que dará a Plataforma de Veciños de Praceres sobre a sentenza do Tribunal Supremo que considera ilegais os recheos do porto de Marín-Pontevedra, que se vai celebrar ás oito desta tarde no salón de plenos municipal. "Queremos amosar a nosa participación e respaldo" a unha iniciativa que "permitirá poñer en evidencia a importancia da loita veciñal polos seus xustos dereitos". Ao mesmo tempo pretenden demostrar que "a loita dos mariñeiros e do pobo de Cangas contra a ilegalidade do porto deportivo do Salgueirón conta con toda a razón moral, pero tamén legal". Por estas razóns de peso, convidan a toda a veciñanza a acudir a esta charla aberta e pública sobre un problema que afecta a todos.
