D.G.P. - CANGAS
"Unha comedia para escachar coa risa". Con esta claridade e rotundidade presentan os responsables de Ónfalo Teatro, unha compañía de recente creación, a montaxe de "Neuras". Trátase dun texto teatral da escritora viguesa María Xosé Queizán e que se estrea, en rigorosa primicia, no Auditorio de Cangas. A representación será hoxe na vila do Morrazo, pero a presentación oficial da mesma tivo lugar onte no Concello de Vigo. Foi un acto no que participaron o alcalde vigués, Abel Caballero; a concelleira de Servizos Sociais, Iolanda Veloso; e o concelleiro cangués de Cultura, Xosé Manuel Pazos. A razón desta dicotomía é que o consistorio de Vigo financia a obra, mentras que o cangués foi quen cedeu o local de ensaio e facilitou a loxística.
A dirección da obra corresponde Afonso Becerra e Ana Contreras. O elenco de protagonistas está composto por Lara Cuervo, que encarna a Sara, a psicóloga; Noemí Vázquez, que será María, a bulímica, e Eva, a súper muller; e Xavier Vázquez, que interpreta ó metrosexual Davide. Aínda que é unha compañía nova, os seus integrantes contan con experiencia docente na Escola Superior de Arte Dramática de Vigo e traballan habitualmente en Madrid.
"Neuras" presenta a uns personaxes novos, desenfadados e aparentemente desinhibidos, aínda que en realidade agochan problemas de aceptación. A propia María Xosé Queizán ten comentado acerca da súa obra que "non só pretendo suscitar a gargallada, senón empregar a crítica e incluso o sarcasmo sobre certos aspectos sociais e políticos do momento". E engade que no texto "non destacan as clases sociais e ha de ser porque as diferenzas entre as persoas son menos de clase que de cultura".
A estrea no Auditorio será ás 21.00 horas e a entrada ten un prezo xeral de 4 euros e de 2 para que presente o Carné Xove, maiores de 65 anos e para familias numerosas.
