Fecimo, "Premio Provincial ao Pequeno Comercio", que concede a Deputación

REDACCIÓN - O MORRAZO A Federación de Comerciantes e Industriais do Morrazo (Fecimo) acadou o Premio Provincial ao Pequeno Comercio na categoría de asociacións comerciais que concede a Deputación de Pontevedra. No acto, celebrado onte no balneario de Mondariz e presidido polo presidente provincial, Rafael Louzán, tamén foi distinguida a carpintería Galsi, de Moaña, na modalidade de innovación no pequeno comercio. Cada un dos galardoados recibiu un cheque por importe de 3.000 euros. O resto dos recoñecementos ó labor comercial, a traxectoria emprendedora e o fomento do autoemprego feminino recaíron en Vila de Cruces (Concello); Droguería Moderna, de Pontevedra (comercio tradicional); e Caevi Calefacción, de Meaño (muller emprendedora). Tamén se lle concedeu un accésit de 2.500 euros ao Centro Comercial Zona Aberta, de Vilagarcía de Arousa.

O obxectivo dos premios é promover e consolidar o comercio de proximidade na provincia, así como impulsar a creación de políticas locais de promoción do comercio e estimular a presenza de mulleres emprendedoras no sector. Xunto con Rafael Louzán, no acto participaron a directora xeral de Comercio, Nava Castro, o deputado provincial Carlos Silva, e Luis Martínez, que participou como poñente. No seu discurso, Louzán fixo fincapé na necesidade de escoitar e respaldar ao sector na situación de crise que se está a atravesar, e falou da elaboración dun Plan Director do Comercio 2009-2012 que define e prioriza as actuacións da Deputación cara esta actividade económica, tanto a nivel individual como colectivo. Este obxectivo susténtase en catro liñas de traballo: apoio á creación e consolidación de centros comerciais abertos; formación do sector e dos seus traballadores; colaborar cos concellos para crear equipos técnicos e servizos de apoio; e poñer en valor, rehabilitar e peonalizar na medida do posible, os centros urbáns.

Revitalización

Pola súa banda, Nava Castro incidiu en que a Consellería de Economía e Industria está a desenvolver diferentes liñas de traballo co obxectivo de revitalizar e modernizar a actividade comercial, así como de consolidar un comercio de calidade e dinámico, capaz de adaptarse aos novos tempos.

Aos Premios Provinciais do Pequeno Comercio presentáronse 102 candidaturas. 17 foron administracións locais; 34, asociacións de comerciantes; 18, entidades aspirantes ao premio en innovación; 21 candidatas no caso de muller emprendedora, e 12 aspirantes ao premio provincial ao comercio tradicional. En total repartíronse 20.000 euros entre os seleccionados.