D.G.P. - BUEU
Alcoholismo, tabaquismo, consumo de cannabis, drogodepencia ou a adición ós móbiles e ás videoconsolas. O programa Concellos Saudables proponse explicarlle a todos os escolares do municipio en que consisten estes problemas que afectan de xeito directo a saúde. Vai facelo a través dunha serie de obradoiros que se celebrarán nos centros educativos e que teñen un claro afán preventivo. O obxectivo non é outro que inculcar hábitos saudables nos máis novos para que no día de mañá sexan uns adultos responsables.
Para poñer en marcah estes obradoiros, o Concello de Bueu conta coa empresa Ciencia Divertida, que se encargará de impartir os contidos. Pero non o fará do xeito tradicional, senón que empregará unha metodoloxía distinta para intentar chegar e concienciar ós rapaces. "Queremos facer as cousas de xeito práctico e divertido, pero sen perder un ápice de rigor. Así logramos que eles mesmos se vexan implicados, que participen e que asimilen os contidos que tentamos transmitir", explica Verónica Iglesias, de Ciencia Divertida.
As sesións terán un marcado carácter interactivo, con experimentos científicos e cono moito humor. "Queremos que vexan que os obradoiros non son unha ameaza, senón que lle imos transmitir unha información que eles necesitan para actuar de xeito responsable", insiste. Os contidos destas actividades estarán adaptados a cada tramo educativo e tamén versarán sobre alimentación, hábitos de hixiene e incluso sobre a tan famosa gripe A.
O concelleiro de Deportes, Manuel Otero, explicou que estes obradoiros chegarán a todos os escolares do municipio xa que se celebrarán dentro do horario lectivo, coa colaboración dos centros e con asistencia obrigatoria. "Non queremos un programa efectista, senón efectivo. Deste xeito garantimos que esta información chegará a todos os nenos de Bueu", suliñou o concelleiro.
