A Escola de Gaitas e Percusión da Deputación de Pontevedra afronta o que é xa o seu cuarto curso no Morrazo e o fai cun récord de alumnos. Nesta ocasión son máis de cen os inscritos e incluso foi necesario establecer un sistema de lista de espera. A apertura oficial das clases 2009/10 tivo lugar onte, coa presencia do vicepresidente provincial José Juan Durán, o deputado José Enrique Sotelo e a do director da escola, Hipólito Cabezas.
Un ano máis a sede da escola estará situada na Academia Stacatto (na Rúa Paz) e haberá sesións de gaita, redobrante e pandeireta. A matrícula é gratuita e na propia escola poñense a disposición dos alumnos os instrumentos musicais. Hipólito Cabezas salientou o esforzo feito pola Deputación á hora de ampliar o material, posto que investiu 25.000 euros na compra de doce novas gaitas para as escolas (con sede no Morrazo, Vigo, Lalín, Pontevedra e Vilanova de Arousa).
Recuperación
Os responsables da iniciativa destacan a recuperación das matrículas despois de que no cambio de goberno municipal, o consistorio retirase a súa colaboración e a escola tivo que abandonar as instalacións do Auditorio municipal. "O ano pasado xa rexistramos un aumento nas inscripcións e este ano practicamente dobráronse", suliña Cabezas.
As clases con máis inscritos son as de gaita, con 50 alumnos e o profesor encargado desta sección é Marcos Campos. En redobrante hai 27, a cargo do mestre Andrés Vilán, e en pandeireta 23, que terán como profesora a Paula Rodríguez.
Os grupos están divididos en tres franxas de idade –menores de 12 anos, entre 12 e 16 anos e adultos– e os matriculados reciben teñen dúas horas semanais de clase, nas que se combinan contidos teóricos (solfeo) e prácticos (instrumento). Compleméntanse con audicións, video e tamén con demostracións a cargo de artesáns musicais.
