A primeira romería do outono

REDACCIÓN - BUEU Un ano máis os veciños do lugar buenense da Portela celebraron as súas festas na honra de San Cosme e San Damián, dous santos irmáns e que son respectivamente os patronos dos médicos e dos farmacéuticos. A festa organízase dende o lado da "raia" buenense, pero en realidade celébrase no lado cangués.E é que a pequena capela na honra dos dous santos está na parroquia canguesa de Coiro.
As honras comezaron o sábado, pero o día grande foi onte coa misa solemne e coa tradicional procesión. A marcha estivo acompañada pola música da Banda de Gaitas Manxadoira de Bueu, que un ano máis non faltou a esta cita xa ineludible. A festa de San Cosme e San Damián soe ser o recordatorio do inicio de outono, pero ante a meteoroloxía destes días nesta ocasión parece que máis ben foi a última romería do verán. Aínda así, a organización tivo a precaución de instalar unha carpa.

Percorrido
O oficio solemne tivo lugar ás 13.30 horas e a procesión percorreu o atrio da capela e dirixiuse cara o cruce da estrada PO-551 no Alto da Portela, lugar dende o que se emprendeu o regreso cara o punto de inicio. Durante o percorrido, as imaxes dos dous santos estiveron acompañadas pola presenza de numerosos fieis.
As celebracións aínda continuaron pola noite, coa habitual verbena nocturna e que serviu para poñer o broche final ó fin de semana. As orquestras encargadas de amenizar a sesión de baile foron Costa Blanca e Estilo. A partir de agora toca esperar ata a vindeira romería, que se celebra en apenas mes e medio tanto nos municipios de Bueu como de Moaña: o San Martiño, aínda que este ano volve a caer no medio da semana.