Os piratas preparan outro asalto a Cangas

Esta vez, ao contrario que en 1617, os piratas turcos berberiscos si que anunciaron día e hora do desembarco. Será este venres arredor das dez da noite, e estaraos agardando unha morea de veciños armados con fouces e sachos coa intención de impedir que volvan arrasar a vila. A resistencia será forte, pero non o conseguirán, e María Soliña será unha das vítimas que pasarán á historia. Nesta ocasión, os protagonistas serán coordinados pola compañía Ningures Produccións, que xa se estrearon na representación durante a Mostra de Teatro e pensan repetila cada setembro.

G.M.P. - CANGAS A estrea, no mes de xullo, sorprendeu aos cangueses e visitantes, que se multiplicaron desde no peirao e polas rúas do Casco Vello para presenciar unha chamativa representación daqueles feitos acontecidos hai preto de catro séculos e que deixaron pegada na historia da vila. Agora volve a repetirse "coa intención de asentarse no final de cada verán, arredor de mediados de setembro", segundo comunicou o concelleiro de Cultura, Xosé Manuel Pazos, que promove a actividade.
O programa contempla a chegada da nave pirata ás instalacións portuarias sobre as dez da noite. A resistencia canguesa provocará loitas en primeira fila, mais os invasores non tardarán en romper a liña e adentrarse por Montero Ríos cara ao casco histórico da vila. Subirán polo Eirado do Costal e comezarán a arrasar o pobo, a aprovisionarse dos seus bens, a violar mulleres e tomar como reféns aos homes. O seguinte escenario sitúase nas rúas Manuel Graña e O Hío ata o adro da ex colexiata, donde se representará o xuízo a María Soliña (encarnada pola actriz moañesa María Salgueiro) na noite de San Xoán. O último capítulo no centro urbano desenvolverase dende a rúa do Sol ata o Eirado do Señal, donde se representará a "danza da liberdade". Para favorecer a visión dos espectadores, esta vez a organización ten preparada unha plataforma sobre a que se situarán os intérpretes.
O desplegue de medios humanos e a previsible aglomeración de público levaron á Concellería de Cultura a solicitar á Policía Local e a Protección Civil un plan de tráfico que contempla restriccións e cortes de rúas. Así, en Montero Ríos a circulación estará prohibida desde as nove e media da noite. Durante todo o día non estará permitido aparcar no Eirado do Costal e nas rúas do Hío, Real e Manuel Graña, así como no Eirado do Señal. Os equipos de seguridade e emerxencias tamén acompañarán á comitiva durante todo o percorrido e situaranse nos puntos estratéxicos.
Sen mercado medieval
O que non haberá este ano é mercado medieval, tal como aconteceu en setembro pasado. Desde o Concello barallan a intención de recuperalo como actividade paralela e dándolle un novo enfoque. Os organizadores buscan implicar á poboación canguesa e que o mercado non sexa só un negocio para os comerciantes que veñen de fóra.