"A música celta consegue transportarme ás miñas raíces"

A fadista Mafalda Arnauth (Lisboa, 1974), acompaña a Milladoiro na xornada de hoxe do Festival Intercéltico. Subirán ao escenario as 22.30 horas. A cantante, considerada unha renovadora no seu país, tamén ofrecerá temas propios.

F.G.S. - MOAÑA –Vostede acompañou a Milladoiro no seu último álbum (A Quinta das Lágrimas), como xurdiu esa colaboración?

–Convidáronme eles. Supoño que escoitarían a miña música, e como buscaba unha voz feminina chamáronme a min. Eu aceptei encantada, pois Milladoiro é unha referencia no folc. Fan unha música con moita enerxía e ademais trátase dun conxunto consolidado. Seguro que no concerto me divirto moito con eles.

–Vostede fai fado. A este lado da fronteira enténdese este estilo musical?

–O meu fado é moi especial e un pouco distinto ao clásico. Xa fixen concertos en Ferrol e en Santiago e o público galego que estivo se identificou ben coa música. Creo que é un pobo con moita espiritualidade, moi sensible e que che da unha acollida moi calurosa.

–Conserva algunha anécdota deses concertos que deu en Galicia?

–Lémbrome que en Santiago chovía moitísimo e iban a cancelar a actuación, pero a xente púxose a bailar cos paraugas e ao final tocamos toda a noite e acabamos empapados.

–Pero hoxe toca no Intercéltico. Como se leva coa chamada “música Celta”?

–Moi ben. Trátase de sonoridades moi atractivas. Encántame esa mestura de percusión e gaita. É un son que me transporta as miñas raíces e que en Portugal é algo difícil escoitar.

–Coñecía o Festival Intercéltico de antes?

–En realidade non. O máis perto que estiven de Moaña foi en Vigo. E como no verán non paro de tocar en canto acabe o concerto terei que voltar a Portugal. Pero como a vida e moi longa prometo regresar para coñecer ben a vila de Moaña.

–Como definiría a súa música para animar á xente a achegarse ao concerto?

–Normalmente toco música moi diversa, mesturo algo clásico con ritmos máis modernos e incluso algo de folclore portugués. O fado é un estado da alma moi especial, e eu vou a intentar transmitirlle ao público as emocións que pretendo expresar coas miñas letras.

–A súa relación con Milladoiro remata con este disco ou teñen pensado prolongala no tempo?

–Estamos buscando máis datas para dar concertos en conxunto. Creo que é un bo encontro entre dous estilos distintos, que hai que aproveitar o maior tempo que poidamos.