O "Noitebús" unirá as parroquias de Cangas os sábados do verán e dará servizo no Nadal

G.M.P. - CANGAS "O que che digo, eu paso de ir en coche. Móvome en Noitebús". Con este lema preséntase a nova campaña do servizo de transporte nocturno que conectará o centro urbano de Cangas e as parroquias nas madrugadas dos meses de xullo e agosto. Os autocares sairán de Rozabales, en Aldán, ás 23:00 horas, á medianoite e á unha da mañá, e da estación de autobuses urbana ás 3:00, 4:00 e 5:00 horas da madrugada. As paradas serán no Cruce de Herbello, Veiga de Arriba, Ponte de Aldán, Vilariño, Igrexario, Pinténs, Vilanova, Nerga, O Viso e Darbo, e o custe da viaxe de ida e volta na mesma noite é de dous euros.
O servizo apunta en varias vertentes: a ecolóxica, fomentando o uso do transporte público e a redución do número de coches particulares; a da seguridade, disminuíndo a siniestralidade, sobre todo xuvenil, nas estradas; e a económica, xa que non hai alternativa máis barata para comunicar o centro e a periferia de Cangas en horas nas que xa non está activo o servizo regular de autobús. "Agardamos convertilo nun éxito e que os novos responsables sigan dándolle apoio", sinalou o concelleiro de Xuventude de Cangas, Óscar Graña, que colabora coa Consellería de Medio Ambiente, Territorio e Infraestructuras na subvención do programa.
Para este verán producíronse algúns cambios con respecto ao anterior. Así, suprímese o servizo os venres, ao constatarse un reducido número de usuarios, e refórzase os sábados, con moito o día máis demandado, así como en días de festas (O Cristo, Aldán, O Hío, Vilariño) ou acontecementos especiais. En xullo estará activo os días 4, 11, 18 e 25, mentres que en agosto será o 1, 8, 14, 15, 22 e 29. Asimesmo, o "Noitebús" funcionará nas vindeiras datas de Fin de Ano e Reis, con servizo as noites do 1, 2 e 5 de xaneiro.
A empresa Cerqueiro volve a ser a encargada de realizar o servizo, que, aínda que se orienta aos xoves, non ten límites de idade nin restricción de outro tipo, incidiu Graña. O verán pasado foron arredor de 1.500 os usuarios que se beneficiaron deste servizo, que tamén utilizan clientes de campings ou alonxados en segundas residencias.