Cela e o tinta femia renovan a súa unión

O entorno do Igrexario de Cela acollerá esta fin de semana unha nova edición da Festa do Viño Tinta Femia, unha cita que xa é toda unha tradición no comezo do verán na comarca do Morrazo. A festa arranca o venres pola tarde e vaise prolongar ata o domingo. Durante eses tres días haberá música, comida variada, bo ambiente e sobre todo viño, moito viño tinta femia. Unha das novidades máis importantes vai vir no pregón inaugural que se lerá o sábado a mediodía. Por primeira vez, esa honra recaerá nunha muller: a escritora Asun Estévez.

REDACCIÓN - BUEU Os incondicionais do viño, e sobre todo do tinta femia, teñen esta fin de semana a súa gran cita na comarca do Morrazo. A parroquia buenense de Cela celebra unha nova edición, e xa van doce, da popular Festa do Viño Tinta Femia. Serán tres días moi intensos, cheos de bo ambiente, moita comida e viño a esgalla.
Un ano máis a celebración terá lugar no entorno do recinto de festas do Igrexario, sito fronte a igrexa parroquial de Santa María. A apertura oficial dos festexos terá lugar o venres a partir das 19.00 horas e pola noite, a partir das 22.00 horas, será o momento da actuación dun grupo musical. O día central será o sábado, que inclúe unha actuación da Coral de Cela, que interpretará uns temas a partir das 13.30 horas. Será o momento previo á lectura do pregón e que este ano trae consigo importantes novidades. Despois de once pregoeiros masculinos, a Festa do Viño Tinta Femia 2009 terá unha pregoeira. Trátase da escritora e poetisa Asun Estévez, que lerá o seu discurso ás 14.00 horas do sábado. E despois será o turno do grupo tradicional Retrouso, que dende as 14.30 horas animará a concurrida hora da comida.
A organización do evento corresponde un ano máis a Asociación de Veciños Santa María de Cela, que manterá o sistema organizativo de anos precedentes. Os colleiteiros participantes disporán dun posto para vender o seu viño e en total participarán oito viticultores. A eles haberá que sumarlles outros tres, que venderán no stand da propia comisión organizadora. Dende a organización confirmaron que o prezo de venta da botella será o mesmo que en ocasións anteriores: sete euros.

Homenaxe
Como xa é tamén unha tradición, os colleiteiros recibirán unha homenaxe por parte da organización. Iso será o domingo, no derradeiro día da festa, e a partir das 19.00 horas. A comisión organizadora apura nestes días os traballos previos de preparacióne adecuación do entorno, nos que espera contar coa axuda do Concello de Bueu.