Un faro para alumear o futuro

REDACCIÓN - BUEU Os alumnos do colexio de A Pedra están de noraboa. Os rapaces e rapazas de quinto curso acaban de gañar un concurso de fotografía convocado polo Parque Nacional Islas Atlánticas. Presentaron unha fotomontaxe na que eles mesmos simulaban ser un faro alumeando sobre a ría. A montaxe complétase cun lema moi claro: “O Parque Nacional ilumina o futuro”.
Todo xurdiu a partir dunha visita que realizaron os estudiantes ás illas Cíes no pasado mes de abril. Eles mesmos encargáronse de documentar e relatar tal evento coa publicación dun artigo propio no xornal escolar baixo o título de “Imos de paseo”. A excursión celebrouse o pasado 22 de abril e os nenos e nenas de A Pedra tiveron que viaxar en autobús ata Vigo. Dende alí colleron o barco para dirixirse ata as Cíes. Unha vez na illa optaron por dividirse en grupos, cada un guiado por monitores do propio parque nacional e que lles foron explicando as características deste espacio natural. Ó mesmo tempo propuxéronlles actividades e xogos para facer aínda máis amena a súa visita. Así, ó chegar tiveron que atopar tres cousas que non estivesen na praia, que lles gustasen e que ademais fosen suaves. Tamén tiveron tempo de achegarse ata os impresionantes cantís de Cíes e puideron observar todo o seu entorno cuns prismáticos. Durante o percorrido os alumnos de A Pedra deberon aprender a orientarse e recibiron como axuda un bolígrafo-brúxula, que lles permitiu situar o norte xeográfico.

Bo sabor de boca
A visita ás Cíes deixou tan bo sabor de boca que o centro decidiu participar nun concurso fotográfico do parque nacional. Optaron por xuntarse todos e formar un faro cos seus corpos. Grazas ás novas tecnoloxías colocaron como fondo de foto unha fermosa paisaxe mariña. O resultado foi tan bo que gañaron o primeiro premio do concurso fotográfico.