O BNG reclamará en Europa recuperar o transporte de ría como servizo público

G.M.P. - O MORRAZO Europa debe dar marcha atrás na liberalización do transporte marítimo de viaxeiros e recuperar o servizo público como maneira máis eficaz de vertebrar os municipios da Ría de Vigo e de potenciar a área no aspecto socioeconómico, laboral e turístico. Así o recalcou onte Ana Miranda, candidata ao Parlamento Europeo polo BNG, que concorre ás eleccións do 7 de xuño na coalición Europa dos Pobos-Verdes. A representante do Bloque establece entre os obxectivos prioritarios que o servizo de ría "entre nas Redes Transeuropeas de Transporte" coa creación dun consorcio público que reciba financiamento comunitario, e cre que no ano 2010 podería formalizarse ese proceso, se hai vontade política.

O BNG citou onte aos medios de comunicación a bordo do barco "Mar de Mouro", do servizo regular entre O Morrazo e Vigo, e no que fixeron a travesía desde Cangas. Miranda estivo acompañada doutros representantes nacionalistas, como o alcalde de Moaña, Xosé Manuel Millán; o teniente de alcalde de Vigo, Santiago Domínguez; o concelleiro de Cangas Óliver Álvarez ou os parlamentarios Carmen Adán e Bieito Lobeira, entre outros. Lobeira abriu a intervención sinalando que seguen apostando por un "transporte marítimo público e de calidade", e arremeteu contra a medida do tribunal europeo de liberalízalo, o que pon en serio risco a súa supervivencia. A situación actual "ven a evidenciar que Galiza ten que ter presenza alá onde se toman as decisións", e así "previr que este tipo de medidas poidan repetirse no futuro". Logo, Santiago Domínguez incidiu na mesma mensaxe e no obxectivo de que o transporte de ría debe cumprir un papel "moi importante para vertebrar a nosa área metropolitana e tamén para vertebrar o país", engadindo a súa relevancia turística nun paraxe "único no mundo". "Desde o 7 de xuño, todos os galegos merecen a representación do BNG en Bruxelas, e Ana Miranda vai defender os intereses do pobo", concluiu.

A candidata do Bloque explicou que a ría de Vigo ten unhas características xeográficas e socioeconómicas que fan necesario o transporte por barco, no que se moven, dixo, arredor de un millón de persoas cada ano. Ademais, o mar é "unha alternativa ecolóxica ás estradas", que "favorece a vertebración social" e que merece unha "política específica" desde a UE.