O científico que pensaba en galego

Lalín conmemora os 50 anos da morte de Ramón Aller cunha exposición e a edición de 'Astronomía a ollo ceibe'

29.03.2016 | 10:39
O científico que pensaba en galego

Tal día coma onte de 1966 Lalín perdía unha das súas figuras máis senlleiras e recoñecidas: Ramón María Aller Ulloa falecía o 28 de marzo dese ano na súa casa de Lalín. O ilustrado sacerdote legaba unha obra formada por ducias de artigos publicados en diferentes medios, catro libros, cinco teses doutorais dirixidas por el, catro estrelas descubertas e numerosos planos e deseños de instrumentos de observación e medición, así coma outros moitos materiais. Parte da súa herdanza pode verse estes días nunha exposición inaugurada onte no marco dos actos organizados na súa memoria.

Ramón María Aller Ulloa cobrou vida onte, xornada na que se cumplía medio século do seu pasamento. Unha homenaxe lembrou a figura do sacerdote astrónomo e matemático nas localidades ás que máis vinculado estivo en vida: Lalín, que o veu dar o primeiro e mailo último alento, e Santiago, onde desenvolveu gran parte da súa actividade académica como membro destacado da súa universidade.

O Observatorio Astronómico da USC, que leva o nome do científico desde 1983, foi o escenario elixido para a presentación do libro Astronomía a ollo ceibe, edición en galego de Astronomía a simple vista, publicada en 1948. En realidade, a obra xa fora anunciada pola prensa xa en 1936 como unha guía de divulgación astronómica en galego, pero o orixinal nunca foi localizado. Agora ve a luz como fora concibida polo seu autor, grazas ao traballo de José Ángel Docobo, director do observatorio universitario, co apoio da Secretaría Xeral de Política Lingüística. O conselleiro de Cultura, Educación e Ordenación Universitaria, Román Rodríguez, gabou a Ramón Aller como "precursor do uso do galego no eido científico" e lembrou que o astrónomo lalinense foi o creador do primeiro observatorio de España na súa casa natal de Lalín. No acto estiveron o reitor, Juan Viaño, ou o alcalde de Lalín, Rafael Cuiña, entre outros.

A homenaxe tivo continuidade á tardiña en Lalín. Primeiro celebrouse unha ofrenda floral diante da estatua de Aller que preside os xardíns da Praza da Igrexa. O museo municipal que leva o seu nome acolleu o resto dos actos, que consistiron nunha doble conferencia para afondar no coñecemento da traxectoria e personalidade do astrónomo e a inauguración dunha exposición. José Ángel Docobo divulgou A Produción científica de Don Ramón e Cecilia Doporto, técnico municipal e comisaria da mostra, desvelou A opinión dos que o coñeceron. A continuación inaugurouse a exposición Ramón Aller, os seus traballos, documentos e fotos, que contén máis dunha trintena de fotografías impresas en negativo sobre cristal realizadas polo sabio lalinense entre 1916 e 1925, que nalgúns casos foron recuperadas pola restauradora María Alejos. Combínase cunha exhibición de traballos científicos, algúns deles inéditos, e coa mostra de aparellos empregados polo investigador para as súas medicións. Xa entrada a noite, para finalizar a xornada, sempre que as condicións meteorolóxicas o permitiran, estaba prevista unha observación astronómica.

Compartir en Twitter
Compartir en Facebook

Noticias relacionadas

Calendario laboral y escolar 2016/2017

Calendario laboral 2017 en Galicia

Calendario Laboral 2017 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2016/2017 .

 

 
Enlaces recomendados: Premios Cine