Tributo a unha boa e xenerosa

Tres meses despois do seu repentino pasamento, o 22 de outubro, o Concello de Vila de Cruces e a Fundación Xosé Neira Vilas renderon unha homenaxe á escritora Anisia Miranda. Ao evento acudiron, ademais, representantes de Cultura e Política Lingüística, así como varios escritores e moitos veciños de cruceños, ata ateigar o auditorio.

SALOMÉ SOUTELO - VILA DE CRUCES Dende que se establecera en Galicia en 1992 co seu home, Anisia Miranda desempeñou un labor "entusiasta e xeneroso" como vicepresidenta da Fundación Xosé Neira Vilas, como dixo onte o director xeral de Promoción e Difusión da Cultura, Francisco López, durante a homenaxe á escritora que tivo lugar no auditorio municipal de Vila de Cruces. A través da promoción da literatura infantil en todas as súas vertentes e da posta en marcha dunha biblioteca na propia fundación, Miranda completou unha dedicación ás letras que xa comezara na súa adolescencia e que durou ata o día do seu pasamento, o pasado 22 de outubro.
A súa biografía e o seu traballo como escritora infantil e tradutora aparece recollido nun libro que edita a Xunta e que onte presentou o propio López, precisamente nun Ano do Libro "no que se botará en falta a figura entrañable de Anisia". Para López, o binomio que dende 1957 compoñían Anisia Miranda e Xosé Neira Vilas ocupa "un lugar primordial na cultura" xa que ambos cumpriron o seu compromiso cos nenos e coa formación das persoas a través dos libros. De aí que a figura da autora de relatos como "Cuando el Che era Ernestillo" tamén recollese as louvanzas de compañeiros de profesión como a poeta Marica Campo ou o escritor e tamén xornalista Víctor Freixanes.
Mais o labor de Anisia non se extende só aos nenos, senón á literatura en galego, en xeral. O mesmo ano en que casou con Neira Vilas, fundou en Bos Aires a editorial Follas Novas, que se encargou de difundir a literatura na súa lingua materna Activista convencida, denunciou o encarceramento, por erro, de cinco loitadores antiterroristas cubanos. De aí que a presenza do secretario xeral de Política Lingüística, Anxo Lorenzo, tamén fose necesaria na homenaxe de onte. Ante un ateigado auditorio tamén desfilaron o grupo A Quenlla, o tenor Cesáreo Torres e o coro Voces da Terra, como complemento lúdico a un acto de recoñecemento no que tamén participaron o alcalde, Jesús Otero e o presidente da Deputación, Rafael Louzán. O esposo de tan prolífica autora estivo, ademais, arroupado por moitos veciños de Vila de Cruces e representantes da Fundación Neira Vilas.