Un serán para a memoria

A figura senlleira de Manuel Daniel Varela Buxán foi quen de encher, onte á noite, as sillas do Museo Municipal Ramón María Aller Ulloa de Lalín. Neste local celebrouse unha homenaxe ao autor estradense afincado en Cercio co gallo da conmemoración do centenario do seu nacemento.

XAN SALGUEIRO - LALÍN Ducias de persoas, principalmente de Deza e Tabeirós, acudiron onte ao acto de lembranza de Manuel Daniel Varela Buxán organizado polo departamento de Cultura do Concello de Lalín. Entre os asistentes á homenaxe estiveron o alcalde de Lalín, José Crespo Iglesias, ou concelleiros coma Paz Pérez ou Marta Lázara. Tamén estivo o novo responsable provincial de Portos, Cristóbal Fernández, e maila súa dona, Isabel Couso, diretora do centro escolar de Cercio que leva o nome do autor de "Se o sei... non volvo á casa" ou "Taberna sen dono", dúas das súas obras máis exitosas entre o público de Bos Aires, compartindo cartel con "Os vellos non deben namorarse", de Castelao. Na cidade austral permaneceu emigrado desde 1930 ata 1950, e onde casou con Maruxa Villanueva.

O prólogo correu a cargo da concelleira Nuria Rodríguez Carral e dos escritores Daniel González Alén, un dos cronistas oficiosos de Lalín, e Xosé Vázquez Pintor. Os tres fixeron unha semblanza do escritor nacido nas terras estradenses de Lamas o 2 de marzo de 1909 e finado na parroquia lalinense de Cercio o 25 de setembro de 1986.

"Salaios dun vello labrego", obra do homenaxeado, considerado "patriarca do teatro galego", foi a peza interpretada polo grupo de teatro Os Abrentiños, do Foxo (A Estrada), na súa memoria. A dirección púxoa Xosé Luna Sanmartín, mentres que a interpretación estivo a cargo de Estela Martínez e Miguel Otero.

A proxección do documental da serie "Galegos", da Televisión de Galicia (TVG), dedicado á Varela Buxán serviu de colofón ao acto. Na película, producida por Tranquilo Producciones de Arxentina e Off Films de Galicia, interveñen, por orde de aparición: Paco Lareo (pintor e escultor de Piloño), Pablo Corlero (xornalista arxentino), Valentín García (normalizador lingüístico do Concello da Estrada), Rómulo Berruti (crítico arxentino), Manuel Méndez (sobriño político de Varela Buxán) e o xa citado Vázquez Pintor. A proxección deste filme tivo unha especial importancia, dadas as dificultades para encontralo. Neste labor foi vital a colaboración da TVG.