REDACCIÓN - LALÍN
Gran parte das butacas do Salón Teatro do Auditorio Municipal de Lalín quedaron baleiras no espectáculo "Fantasmas familiares", que Quico Cadaval representou co patrocinio de Caixanova. A entrada custaba 8 euros, que para quen si estivo presente foron ben merecidos dada a graza e profesionalidade do artista.
Creada a partir de narracións da tradición oral, a obra escenificada onte foi transformada ao longo dos últimos quince anos, acomodándose ás circunstancias ambientais, ás inclemencias meteorolóxicas, ás experiencias persoais do artista e aos terrores máis íntimos do público. Antes de chegar a Lalín, Cadaval paseou os seus fantasmas por festivais tan prestixiosos como o de Bucaramanga (Colombia), Almada (Portugal), a Feira do Libro da Habana (Cuba), o Maratón dos Contos de Guadalajara (España) ou a Fundación Gulbenkian de París (Franza) e, en vindeiras datas, acudirá a Río de Janeiro e Sao Paulo (Brasil).
