"O importante é que o pan de Galicia sexa bo, e non primar só o dunha zona"

Naceu en Carballedo, Lugo, no 1940. Durante máis de 40 anos exerceu como mestre e compaxinou esta actividade coa súa faceta de escritor. Actualmente vive a cabalo entre Vigo e Monterroso, de onde é a súa muller. Comezou a súa andaina literaria con libros de narrativa aínda que tamén ten publicado literatura infantil e estudos sobre temas etnográficos e artigos en revistas.

LAURA MARTÍNEZ - SILLEDA O escritor Xosé Lois Ripalda visitará hoxe Silleda con motivo dos actos de exaltación do pan que se levarán esta tarde a cabo no municipio dezao. A asociación de veciños Olaia encárgase de organizar esta xornada, que contou ademais co apoio do gremio dos panadeiros silledenses. Os actos comenzarán ás 18.00 horas co xogo de parchís para nenos e maiores. A continuación Xose Lois Ripalda charlará sobre a importancia do pan na sociedade galega, posto que ten xa tratado esta temática nun libro chamado A cultura do pan. Ás 19.30 horas a Banda Xuvenil de Música de Silleda ofrecerá un concerto e a degustación de pan e outros productos pechará os actos.

–A súa intervención de hoxe versará sobre o pan. En que aspectos se vai centrar?

–Aos meus 69 anos, coñezo o proceso tradicional que se realizaba hai xa máis de cen para facer o pan. O tema central que tratarei en Silleda é a viaxe que facía o gran dende a leira ata que chegaba ao muíño para acabar finalmente no forno, posto que á miña aldea non entraban as maquinas.

–Por que ten importancia lembrar ese proceso agrícola?

–É preciso lembrar estas técnicas e facer fincapé de novo en valores presentes daquela, posto que é certo que se gañou en tempo, pero perdeuse por exemplo a unión entre as xentes. Os veciños axudaban nestas labouras, como tamén ocorría ademais de na seitura e na malla, na vendima ou na colleita do liño.

–Ten escrito vostede sobre a cultura do pan, e en Galicia hai moitos municipios que exportan o seu produto. Que posición ocupa o pan de Silleda?

–Creo que é preciso deixar atrás diferenzas como as que se fan ao falar do pan de Cea, Carballo, Carral, Porriño...o importante é que o pan de Galicia sexa bo e non primar un sobre outro. É triste que teñamos que ir a estes sitios para atopar o seu pan e que non sexa de calidade en toda Galicia.

–Agora que está retirado da docencia, ten outros proxectos literarios en mente?

–En breve sairá ao mercado o meu último libro Viaxe de Vigo aos Ancares, na que un grupo de alumnos van descubrindo a natureza e outras moitas cousas da vida. É un libro froito das vivenzas. Tamén teño en mente unha publicación sobre os faros de Galicia así como sobre a vendima, xa que ao facer un sobre o pan e ao ser eu da zona de montaña teño que facerlle caso ao refrán: con pan e viño ándase o camiño.