Lalín homenaxeará aos antigos muiñeiros da zona na vindeira edición da Malla Tradicional

DANIEL FERNÁNDEZ - LALÍN O Concello de Lalín e o Museo Casa do Patrón presentaron onte a décima edición da Malla Tradicional, que conta como principais novidades o seu esparexemento durante tres fins de semana para darlle máis difusión, un concurso de vestimentas de época e a introducción de souvenirs de recordo, como males e panoletas.
O programa comenzará o día 22 de agosto co acto da sega, que servirá de preludio para o acto central da malla que terá lugar unha semana despois. Xa neste 29 de agosto, a cita comezará ás 11.00 horas, nas inmediacións do museo en Doade, cunha mostra de artesanía popular participada integramente por pezas da bisbarra dezá. A partires do mediodía, arrancará o acto central da malla, que está aberto á participación de todo o público e que incluirá a realización desta labor con pedras, con males e con máquinas e aventadoras. Asimesmo, haberá un concurso de vestementas de época, que outorgará unha estancia no hotel Katiuska de Silleda ao gañador. O presidente de Casa do Patrón, Manolo Blanco, pediu á xente un “esforzo” para este certame do mesmo xeito que o está a facer a organización.
Rematada esta laboura, ás 14.00 horas haberá un xantar con polbo, empanada, lacón e outros productos típicos e, xa pola tarde, organizaranse xogos populares con premios e soará a beizosa música de gaitas dos Trasnos de Doade. Ademais, a organización contará coa presenza dos Cabaleiros do Deza e venderá os souvenirs de males e panoletas a un prezo simbólico.

Moenda e cocido tradicional

A X Malla Tradicional completará a súa triloxía o 5 de setembro coa moenda e o cocido tradicional, que permitirá volver a ver funcionar dous antigos muiños do río Asneiro. Como principal novidade esta data, farase unha homenaxe aos antigos muiñeiros da zona, que segundo o concelleiro Nicolás Varela “fixeron unha labor importantísima”. Na actualidade só cinco ou seis seguen vivos. Neste acto, falará Xabier Lores, presidente da Asociación Galega dos Muiños, que abordará o aspecto humano dos muiñeiros, aínda que tamén tocará cuestións de índole patrimonial.
O concelleiro de Turismo de Lalín, Nicolás Varela, resaltou a importancia de vivir un día “como antigamente se facía a malla” e apostou por seguir consolidando este acto, “xa que se trata dun dos principais referentes culturais e turísticos do concello”. Pola súa banda, Manolo Blanco amosou as súas esperanzas en que a climatoloxía siga coma nestes días para que o trigo poida madurar e se poidan celebrar os actos con normalidade. Tamén incideu na importancia da difusión do evento na zona de Santiago e na provincia de Pontevedra a través do Padroado Rías Baixas para aumentar a presenza de público. “É algo típico do interior de Galicia e é preciso darlle repercusión”, engadiu Blanco, que confía en volver a superar o récord de asistencia.