Homenaxe á paz no colexio da Piedade

QUIQUE V. - VILA DE CRUCES Nesta escultura de 2,60 metros de alto por 0,45 de ancho, Paco Lareo emprega unha técnica mixta consistente na fusión do granito e máis o aceiro inoxidable, nun intento de crear un nexo entre a raigame ancestral da pedra e os modernos metales da actualidade. Afirma o artista de Piloño que agarda que os nenos e nenas do CEIP saiban atopar unha motivación creadora a través da simboloxía por el utilizada para representar a paz.

O artista describe esta simboloxía como tradicional, pero baixo a súa propia visión; así, a paloma segue sendo a “protagonista principal e final” desta escultura, pero en vez dun ramo de oliveira, leva no pico unha margarita, flor que Lareo describe como a máis representativa das nosas terras: “É a flor que alfombra os nosos prados. Na cor blanca dos seus pétalos amosa a pureza do sinxelo. A cor amarela representa o grande pan de bróa que sostén a dignidade creadora e dialogante, da que precisamente ten que xurdir ese diálogo que fai que, a través da palabra e da idea, se alimente e se sosteña a paz”.

Respecto á idea de humanización de espazos a base de elementos motivadores, di Paco Lareo: “Estamos aquí para facer a historia e a cultura do futuro, o que sería imposible se non tivesemos a oportunidade de mergullarnos na paisaxe da que xurden as ideas que axudan a reavivar a memoria histórica que nos enche de orgullo, e refírome á memoria cultural, á da expresión, á da dignidade da fala e das formas, non outra. Cando todos nos sintamos orgullosos do que temos, do que é noso, estaremos a facer un camiño de humanidade para o futuro das novas xeracións”.

Para a consecución final e instalación da escultura, Lareo contou coa colaboración de Luis O Vila e de Manuel Lareo, axuda que dende aquí lles agradece.