Proxectada por primeira vez hai dous anos, a película "Sicixia", dirixida por Ignacio Vilar, converteuse nun dos fitos máis importantes do audiovisual galego, algo que non pasou desapercibido para Concellos como Vilanova de Arousa, que presentan o filme grabado na Costa do Morte como a súa aposta para a celebración do Día das Letras Galegas, o vindeiro 17 de Maio.
O alcalde de Vilanova, Gonzalo Durán, e o director da película, presentaron onte esta actividade que se vai desenvolver nas instalacións do Multiusos a partires das 19.00 horas do día 17. Na presentación do acto, Gonzalo Durán lembrou unhas palabras que lle dixo o fillo de Ramón María del Valle-Inclán nas que lle dicía que "a mellor maneira de homenaxear a meu pai é representando a súa obra, pois así ocorre co galego, a mellor maneira de homenaxear á nosa lingua e dando a coñecer un traballo como 'Sicixia', feito en Galicia e onde se contan cousas positivas da nosa terra, como a nosa cultura e a nosa forma de ser, nada que ver con series que só queren ver fariña".
Nacho Vilar destacou os vencellos que o filme mantén coa ría de Arousa, xa que, pese a estar feito case integramente na Costa da Morte "tanto o principio como o final, onde se ve o fondo do mar, foron grabados en augas desta ría para aproveitar a visión das algas mariñas". Vilar destacou que o filme servíu para visibilizar o traballo dun audiovisual galego onde existe moita calidade, xa que "moi pronto se converteu nun éxito, con proxeccións en diferentes partes do mundo e converténdose nunha das películas que máis tempo se manteu na carteleira en toda España". O director tamén agradeceu a posibilidad de proxectar a película en Vilanova, na terra de Valle-Inclán, "escritor que considero un dos meus mestres e do que sempre tiven a teima de levar ao cine unha das súas 'Comedias Bárbaras', o guión xa o teño, agora tan só falta levala a cabo". Durán tamén animou a toda a comarca a achegarse a Vilanova a ver esta película o vindeiro día 17, sobre todo porque "o Multiusos ten unha capacidade para máis de 1.800 persoas, o que o pode convertir na sá de cine máis grande de Galicia".
