Preto de cen persoas concéntranse contra o "decretazo" da lingua en Vilagarcía

F.FRIEIRO - VILAGARCÍA Preto de cen persoas concentráronse a última hora da tarde de onte na Praza de Galicia para mostrar a súa repulsa ao que chaman"decretazo" da lingua aprobada o sábado polo goberno autonómico. Vilagarcía sumouse así aos actos de protesta convocados en distintas cidades de Galicia pola plataforma Queremos Galego. Foron os responsables comarcais deste colectivo os que censuraron a "nocturnidade e alevosía" coa que, segundo eles, foi aprobado o controvertido documento. Un voceiro da agrupación criticou o documento porque "non garante que o estudantado remate a etapa educativa con destreza na lingua" así como "é unha proposta feita de costas á cidadanía e que está tendo un rexeitamente por parte de distintos sectores da sociedade".
No acto, no que estiveron presentes responsables nacionalistas do goberno local, tamén se falou de que esta nova normativa vai supor un "enfrontamento entre os centros educativos e unha deixadez de funcións evidente dado que traslada o problema aos profesorado e ás propias familias".
Dende Queremos Galego insisten en que a entrada en vigor do "decretazo, vulnera leis básicas como a de Normalización Lingüística ou acordos parlamentarios como o Plan Xeral de normalización da lingua galega".
De feito, a plataforma non descarta continuar coas movilizacións para conseguir que o goberno autonómico mude de parecer.
No transcurso da concentración de onte, organizacións opostas ao defendido pola plataforma repartiron pasquíns informativos, unha actitude que por parte dalgúns colectivos presentes na protesta foi calificada de "boicot".