A.M. - O SALNÉS
A polémica polo decreto sobre a lingua galega nos centros educativos tamén afecta ó Salnés. Así, os socios arousáns da plataforma Queremos Galego van enviar unha carta a todas as asociacións de pais de alumnos do Salnés, para pedirlles que apoien, na medida do posible, a folga do 21 de xaneiro.
Para iso, a plataforma que preside Xabier Ríos propón ás familias que este xoves non manden os nenos á escola, e que acudan á manifestación que se vai celebrar en Santiago de Compostela, e que sae da Alameda ás 11.30 horas. Os que queiran desprazarse en transporte público ata a capital de Galicia poden facelo nos autobuses gratuitos contratados por Queremos Galego. Para iso hai que reservar praza nos teléfonos 986.565.059 ou 986.505.323.
Para esta entidade, o “decretazo” en materia lingüística da Xunta de Galicia causará diversos problemas, así como enfrontamentos dentro dos centros educativos, unha rebaixa na calidade do ensino e máis casos de fracaso escolar. Ademáis, Xabier Ríos insiste en que o decreto do goberno de Alberto Núñez Feijóo pon en risco a propia supervivencia do idioma galego.
Outras entidades
O voceiro do BNG –e tenente de alcalde– de Vilagarcía, Xosé Castro Ratón, presenta unha moción para que a corporación inste á Xunta de Galicia a retirar o borrador de decreto, a respectar a normalización lingüística contemplada no Estatuto e a volver ó diálogo social.
Os nacionalistas apelan a diversos informes oficiais segundo os cales cada vez hai menos galego-falantes e existen ámbitos, como o xudicial, nos que a presencia desta lingua aínda é testemuñal. Tamén o movemento de renovación pedagóxica Nova Escola Galega emitiu un comunicado de protesta, alegando que o decreto do plurilingüismo “supón un ataque sen precedentes á lingua e á cultura galegas”, e anima á “participación masiva” na folga do xoves.
