A.M. - CAMBADOS
Entre 1948 e 1951 Ramón Cabanillas pasou longas tempadas no mosteiro de Samos. Durante esa época escribiu un poemario que vería a luz uns anos despois, a finais da década dos cincuenta. "A significación de Samos" foi a conferencia inicial dunhas xornadas sobre Cabanillas que se celebran dende onte en Cambados.
A ponencia correu a cargo de Carlos Bernández, que é colaborador habitual dos suplementos culturais de FARO. Na súa opinión, "Samos" é un poemario que reflicte "o ideal estético de Cabanillas e os que para el eran os valores da identidade galega profunda".
Ramón Cabanillas tiña fortes crenzas relixiosas, e o mosteiro de Samos foi para el como un refuxio, tanto individual como colectivo, ó entender que entre as pedras dos mosteiros medievais pervivían os sinais máis propios da cultura galega. A este respecto, lembra Bernández que a xénese de "Samos" se produce durante a etapa inicial do franquismo, que foi moi adversa para a cultura galega.
Despois da conferencia, houbo un recital poético e musical titulado "Cabanillas na voz dos poetas de hoxe". Interviron os escritores Silvia Penas, Elvira Riveiro, Miro Villar, Ramón Caride, Domingo Tabuyo e Luis González Tosar e o músico Kamo Petrosyan.
Estas xornadas comezaron onte pola tarde e rematan esta mañá. Estanse celebrando no Centro Comarcal do Salnés –situado no Paseo da Calzada– e organízaas o centro galego do PEN Club, que é unha das principais asociacións de escritores.
O programa de actos para hoxe inclúe a presentación dun dos libros máis importantes do ano, a "Poesía galega completa" de Ramón Cabanillas, que recompilou a editorial Xerais. A presentación da obra está prevista para as 11.30 horas.
Unha hora despois, Xosé María Dobarro, Xosé Ramón Pena e Luis Rei dan unha conferencia titulada "Actualidade da obra de Cabanillas". Estas xornadas están patrocinadas polo Ministerio de Cultura e a Dirección General del Libro, Bibliotecas y Archivos e a súa coordinación corre a cargo de Domingo Tabuyo e Ramón Caride.
