F.F. - VILAGARCÍA
Adolescentes, educación e, sobre todo, moita literatura. Estes son os tres eixos fundamentais sobre os que xiran os tradicionais Encontros de Casaescola, unhas xornadas teórico prácticas desenvolvidas en colaboración cos centros educativos da capital arousana.
O programa de actividades arranca hoxe no salón de actos do instituto Castro Alobre a partir das oito da tarde cunha sesión especial do "Clube de Lectura" na que participará un dos autores galegos máis recoñecidos, Domingo Villar. Non é máis que un aperitivo literario perfecto para a xornada do próximo 30 de novembro na que a docente e formadora da Red Noria, Carmen Loureiro, ofrecerá unha charla no Auditorio municipal sobre a problemática dos adolescentes na sociedade actual e a responsabilidade que no seu comportamento pode ter a educación recibida nas aulas.
Será este, xunto coa literatura galega como telón de fondo, o fío condutor das sesións posteriores que pretenden buscar solucións tanto para os docentes como para os pais nunha problemática que preocupa por igual a todos os sectores da sociedade, tal e como indican dende Casaescola.
A axenda marcada polo colectivo vilagarciano continúa o 1 de decembro con unha sesión sobre "Poesía Necesaria" impartida polo escritor e docente, Antonio García Teijeiro no Auditorio. É este mesmo marco o elixido polos organizadores para clausurar uns Encontros que gozan de gran vigor dende que foron constituídos. A representante da editorial Kalandraka, Ana Abelenda, ofrecerá unha visión panorámica da importancia de consumir literatura dende o berce e, sobre todo, de qué tipo de autores son os máis aconsellables. Unha forma diferente de educar dende os libros e, sobre todo, de educar para medrar.
