F.F. - CAMBADOS
Cambados puido presumir onte de terse convertido na capital galega das novas tecnoloxías e das coñecidas e populares "redes sociais". Forofos do servidor "youtube" achegáronse ata a capital do albariño para celebrar a segunda edición do encontro de confraternidade promovido pola asociación deportiva e cultural Unha Grande Chea.
O programa de actividades cumpriuse segundo o previsto e tendo en conta que os participantes viñeron, sobre todo, con gañas de divertirse. Fefiñáns convertiuse no punto de encontro de afeccionados non só ao mundo web, senón tamén á boa gastronomía, ao albariño máis tradicional e á música da terra.
A choiva non impideu que os membros da expedición participasen durante boa parte da mañá nunha visita turística polos enclaves máis emblemáticos desde concello arousano. A excursión foi breve, pero intensa, e estivo seguida a continuación por unha visita ao Pazo de Ulloa e á bodega "A Capitana" donde degustaron un dos mellores caldos da comarca.
Non foi máis que un aperitivo perfecto para a recepción oficial que tivo lugar na Casa Consistorial e para un gran xantar de confraternidade que se trasladou durante boa parte da xornada ata as dependencias do restaurante "Os Pazos". Alí, como non podía ser doutra forma tendo en conta que Unha Grande Chea sempre leva aparellada a festa rachada, sonaron temas emblemáticos como o himno da asociación "Heite esmajare" ou pezas propias da terra galega.
A segunda edición desta gran xornada rematou a altas horas da madrugada coa promesa de convertirse nun referente en anos vindeiros para cibernautas de toda Galicia. Dende a organización destacaron a boa acollida deste encontro, pese ás malas condicións meteorolóxicas. O certo é que Unha Grande Chea é un dos colectivos da comarca do Salnés cunha implicación máis directa en espazos como "youtube" ou "myspace", as claves dun futuro para o esparcemento social e unha forma de dar a coñecer non só a función da propia asociación, senón tamén as riquezas de Cambados e de toda a terra que o rodea máis alá das fronteiras galegas e españolas.
