A.M. - CAMBADOS
Cambados foi posiblemente onte pola tarde a "capital cultural" de Galicia. A razón é que durante unhas horas concentráronse na vila arousana algúns dos escritores, filólogos ou historiadores máis destacados da comunidade. A Real Academia Galega (RAG) non quixo ser allea ás homenaxes a Ramón Cabanillas –falecido hai agora cincuenta anos– e onte celebrou en Cambados unha sesión plenaria extraordinaria, unha das poucas que fan fóra da súa sede estable.
O acto da Academia permitiu que o público escoitase as intervencións de destacados académicos, como os escritores Xosé Luis Méndez Ferrín, Darío Xohán Cabana, Víctor Freixanes ou Xosé Neira Vilas; a documentalista e creadora audiovisual Margarita Ledo Andión; o filólogo cambadés Francisco Fernández Rei; ou o historiador e presidente da RAG, Xosé Ramón Barreiro.
O acto da Academia foi variado. Así, houbo unha recepción na casa consistorial, que presidiu o alcalde de Cambados, Luis Aragunde; unha ofrenda floral e poética ante o monumento a Cabanillas do Paseo da Calzada; un cortexo cívico dende A Calzada ata o auditorio da Xuventude; recitado de poemas; lecturas de discursos; e música, a cargo de "Con de Xido" e de Xaquín Xesteira, que puxo o colofón ó acto coa interpretación do himno galego.
Na súa intervención, Luis Aragunde lembrou que a de onte foi a terceira visita da RAG a Cambados –a primeira fora en 1960, con motivo da inauguración do monumento da Calzada, e a segunda en 1976, ano en que se lle adicou o Día das Letras Galegas a Cabanillas–, e ensalzou do poeta cambadés "a súa rebeldía contra a inxustiza que supoñía o duro traballo sen recompensa" de moitas familias labregas e mariñeiras. Tamén o cualificou como "home íntegro, combativo, inquedo e humilde na súa querencia franciscana".
Tamén lembrou Aragunde que Cabanillas foi membro das Academias galega (desde 1920) e española (desde 1929) e volveu anunciar a edición dun libro cunha escolma de poemas do bardo de Fefiñáns que se distribuirá por todas as casas de Cambados, e que está ultimando Francisco Fernández Rei.
Doutra banda, os actos do Ano Cabanillas prosiguen hoxe ás 19 horas na Xuventude cun recital poético e teatral.
