"O PSOE vilanovés debe volver ser unha alternativa de goberno"

A. G. - VILANOVA Jorge María López é o presidente da xestora do Partido Socialista en Vilanova, unha responsabilidade que non lle é descoñecida, xa que exerceu noutra etapa como secretario de organización local da formación. Vilagarciano de nacemento, aínda que vilanovés de adopción, a súa primeira aparición pública vai ter lugar no próximo congreso provincial, despois de que a asamblea local o designase como o seu representante neste eido frente á outra opción que se presentou.

–Coller as rendas do Partido en Vilanova debe ser todo un reto.

–Nestes momentos é un reto complicado, pero tamén ilusionante, porque Vilanova é un Concello que necesita un goberno de progreso como o que lle pode dar o Partido Socialista. O noso obxectivo é tratar de fortalecer o PSOE para convertirnos nunha alternativa seria de goberno á hexemonía que amosou o PP nos últimos anos.

–Vostede xa é un vello coñecido no Partido aínda que se atopaba un pouco ao marxe ¿Que o levou a regresar?

–Ben é certo que a política tróuxome máis dun disgusto, pero considero que o partido necesita unha renovación de caras, de persoas, de ideas; unha política cunha clara visión de poder alcanzar o goberno en Vilanova. Somos conscientes de que vai ser unha tarefa difícil, pero levando a educación como bandeira, prendendo a chama do PSOE.

–O Partido non atravesa polos seus mellores momentos en Vilanova ¿Como se vai articular a partires de agora?

–Formo parte dunha xestora na que están dous compañeiros exemplares, como son o concelleiro Manuel Álvarez Eirea e Benito Diz. O obxectivo que nos fixou o Partido é articular unha executiva local antes do 30 de novembro. Cremos que é pouco prazo, pero imos tratar de cumprilo exercitando un importante traballo de renovación, que pode afectar incluso aos candidatos que presentemos ás próximas elección municipais.

–¿Vaise contar co actual grupo municipal?

–A idea da xestora é que todos camiñemos nun único sentido: tratando de ser máis fortes para conseguir o obxectivo prioritario de que a xente vislumbre que somos unha alternativa de goberno dentro de dous anos. Nese camiño queremos fortalecer a formación.

–Sen embargo, Vilanova é unha das prazas fortes do Partido Popular en O Salnés

–É certo, pero a nosa obriga é cambiar esa situación. De feito, o Partido Popular de Vilanova está a atravesar por malos momentos, cunha división interna importante, algo que, co paso do tempo, poden acabar pagando. A nosa obriga é crear ilusión na xente para acabar canto antes con esa hexemonía de catorce anos. Desde a executiva entendemos que, de vez en cando, é convinte ventilar as institucións e os modos, e o Concello de Vilanova é un claro exemplo desa necesidade.