A nai de todas as regatas

Plenamente consolidadas en case todas as rías galegas, as regatas de dornas convertíronse nun dos elementos máis atractivos de cada verán, especialmente na ría de Arousa, onde teñen lugar a maioría delas. Sen embargo, houbo un tempo en que isto non era nada habitual. Coa dorna a punto de desaparecer, unha serie de directivos da Asociación Cultural e Deportiva Dorna optaron hai 25 anos por pór en marcha unha regata que, un cuarto de século despois, acabou por convertirse no referente e no exemplo a seguir por parte de todos os colectivos da FGCMF.

A. G. - A ILLA A Volta Á Illa foi o punto de inflexión máis importante na recuperación das embarcacións tradicionais, o momento en que, abocadas á desaparición, un grupo de persoas optou por manter unha das riquezas etnográficas e patrimoniais máis importantes coas que conta o mar galego. Ese grupo descoñecía que estaba pondo os alicerces do que sería todo un movemento para manter viva a presencia destas embarcacións tradicionais, provocando que moitas outras asociacións doutros concellos se sumasen e acabasen creando a Federación Galega pola Cultura Marítima, organizadora dos Encontros de Embarcacións Tradicionais.
Un cuarto de século despois, a Asociación Cultural e Deportiva Dorna, a Volta Á Illa converteuse na nai de todas as regatas, no que algúns consideran como a Copa América das dornas. Por este motivo, o colectivo que dirixe Uxío Allo ten previsto un importante número de actividades que permitan celebrar por todo o alto o aniversario da regata. Na presentación que se celebrou onte, elaborouse un vídeo con algúns dos mellores momentos que se viviron sobre as augas que bañan os sete kilómetros cuadrados de A Illa. Tamén para conmemorar o XXV aniversario elaborouse unha exposición con imaxes e nomes das 24 dornas e tripulantes que acadaron a victoria durante todos estes anos.
Desde Dorna destácase como foi medrando a participación neste evento. De feito, en 1985, cando se celebrou a primeira das regatas, só participaron 13 embarcacións, número que se elevou a 25 na segunda edición. Nos últimos anos, a participación non baixou moito das corenta dornas.
A seguinte aportación de A Illa á preservación deste tipo de embarcacións foi a posta en marcha da Escola de Navegación Tradicional, unha iniciativa que permitíu formar a varias decenas de mariñeiros e conseguir expandir a aposta pola preservación da etnografía mariñeira de Galicia. Queda pendente a construcción dunhas instalacións dignas para poder gardar as embarcacións, que nestes momentos se deixan en O Bao durante o verán, mentres que para pasar o inverno teñen que recurrir a alquilar unha nave en Vilaxoán.
Volta en bicicleta
Ademais da navegación, vaise celebrar a I Volta Á Illa en Bici, impulsada polo colectivo Arousa en Bici, percorrendo os participantes todo o perímetro do municipio mentres se desenvolve a proba.
Os integrantes de Arousa en Bici non dubidaron en sumarse ás celebracións polo XXV aniversario da proba xa que, como afirmaron durante a presentación, "A Illa ten uns importantes valores ecolóxicos que coas sendas peatonais que se están a construir, agardamos que animen á xente a desfrutar da beleza deste importante espazo natural". Esta tese foi respaldada polo propio alcalde de A Illa, Manuel Vázquez, que non dubidou en recoñecer que "A Illa non está feita para os coches, por iso agardo que a maioría dos veciños opten por usar máis un medio de transporte como é a bicicleta.
Recoñecemento
Na presentación tamén estivo o expresidente, e agora vogal, da Federación Galega pola Cultura Marítima e Fluvial, Fernando Piñeiro, que ademais de felicitar a Dorna por este aniversario, lembrou todos os avances que se rexistraron no mundo das embarcacións tradicionais durante este tempo.
De estar a piques de desaparecer, o patrimonio marítimo galego converteuse nun exemplo de preservación para toda Europa, traballo que foi premiado recentemente ao incluir a FGCMF dentro do European Maritime Heritage, a organización máis importante neste sector, con contactos na Unión Europea e na Unesco.
Ademais, dentro de Galicia acadouse un importante recoñecemento social, gracias sobre todo á celebración dos Encontros de Embarcacións Tradicionais en algúns dos portos máis emblemáticos.
Encontros en Muros
Este ano, a quenda tócalle a Muros, onde no primeiro fin de semana de xullo se van celebrar os IX Encontros de Embarcacións Tradicionais de Galicia, a onde ademais das embarcacións da ría de Arousa, van a participar varias delegacións procedentes doutros puntos de Europa.