Como vén sendo habitual, a programación das Letras Galegas de Cambados iniciouse onte coa mostra de teatro escolar. Onte subiron ó escenario da Xuventude os escolares do colexio San Tomé, que representaron "Na neve. Un conto da rata Luisa", e o cadro de declamación do instituto Ramón Cabanillas, que puxo en escena "Rosas para Cabanillas", un recital poético acompañado de piano.

A mostra de teatro sigue esta tarde –a partir das 18 horas– coa actuación dos colexios Enrique Barreiro de Vilariño e o Antonio Magariños. Os alumnos deste centro representan "A man de Santiña", unha peza orixinal de Ramón Cabanillas.

A programación do Concello de Cambados para as Letras Galegas complétase coa tradicional ofrenda floral e poética na escultura que hai no Paseo da Calzada na honra de Cabanillas –mañá vernes, ás 12.45 horas–, e cun concerto de María do Ceo, que actúa o domingo no auditorio da Xuventude. Tamén se van colocar na Calzada os grandes paneis con traballos escolares sobre Cabanillas e o autor homenaxeado este ano o 17 de maio, Ramón Piñeiro. Finalmente, queda pendente de confirmar a data e hora do concerto da Banda de Música de Castrelo.

Pero no caso de Cambados tamén é salientable a actividade que desenvolven os libreiros con motivo das Letras Galegas. Neste sentido, celebran unha feira do libro o domingo pola mañá; e o sábado concédenlle ó académico cambadés Francisco Fernández Rei o premio Ramón Cabanillas, que chega este ano á súa sexta edición.

Trátase dun evento que vai ser moi especial, pois haberá recitado de poemas co cambadés Xosé María Ribadomar, a proxección dun audiovisual elaborado por Chourizo Films, que é unha versión libre dun poema de Cabanillas e un concerto de música organizado por Unha Grande Chea. O acto termina cunha cea con Fernández Rei na "Traíña".