A posición da Consellaría de Innovación e Industria e do BNG claramente contraria a que desapareza a Tarifa 2.0N (coñecida como Tarifa Nocturna) -posición que tamén manteñen numerosos concellos galegos- sitúa no debate social a paradoxal situación de Galiza no sector eléctrico.
É ben coñecido que o noso país é un grande transformador de enerxía eléctrica, con custos sociais e ambientais moi importantes que nunca tiveron compensación por parte do Estado, gobernase quen gobernase. No entanto, a pesar da nosa capacidade como exportadores, asistimos sempre a un discurso oficial sobre que as tarifas son únicas e iguais no Estado para garantir o equilibrio interterritorial. Por iso as perdas no transporte non se discriminan nas tarifas, senón que as pagamos solidariamente todos os usarios e usuarias.
Porén, a realidade non é esa. A proposta que fai desaparecer a Tarifa Nocturna deixa claro que a súa supresión tería consecuencias piores para Galiza que para outras partes do Estado, por mor do noso clima que nos obriga a un equipamento e a uns consumos específicos.
Mais non é este o único caso. En Xaneiro do 2007 desapareceu a Tarifa B.0, que era exclusiva para o alumeado público dos concellos, tiña un prezo baixo por Kw e non pagaba o termo de potencia. A desaparición desta tarifa ten un maior impacto económico nos concellos galegos, pois teñen que dar cobertura a máis de 30.000 núcleos de poboación, que significan o 50% do Estado.
Tamén é salientábel que no reparto do denominado Fondo de Tarifa, unha partida que se distribúe anualmente entre as Comunidades Autónomas para a mellora de calidade da subministración eléctrica, vemos que, cos criterios establecidos polo Goberno do Estado, Galiza recibe menos fondos que a porcentaxe de poboación que ten.
É dicir, somos excedentarios na produción eléctrica, padecemos os custos sociais e ambientais, mais logo, vía tarifas, somos discriminados negativamente. Esta é unha situación anacrónica que os partidos políticos estatais en Galiza sempre agochan.
*Portavoz do BNG de Industria e Traballo
no Parlamento Galego
AUMENTAR TEXTO »
