Dado que as noticias de Lisboa soen chegar a Galicia dando un arrodeo por Madrid, onde xeralmente non son ben interpretadas, o mais seguro é que Vostedes non saiban moito dun acontecemento cultural de primeiro orde que nos afecta moito aos que habitamos as marxes destas rías. Graça Videira Lopes, investigadora que coñece até o derrairo segredo da literatura medieval, de aló e de acó, fixo sair á luz en dous volumes, so o título de Cantigas medievais galego-portuguesas, a totalidade das composicións poéticas que se conservan escritas na lingua medieval común, menos case todas as Cántigas de Santa María. Isto constitúe, en palabras da autora, o "corpus integral profano". De xeito que, na compilación, encontrarán as espléndidas composicións satíricas e amatorias de Afonso X o Sabio, pero non a maioría dos seus poemas de propaganda mariana e intención ideolóxica católica marcada porque constitúen un universo literario, ou mesmo unha literatura, diferente por moito que a expresión siga a ser galega ou, se se quer, galegoportuguesa.
Aínda así, Graça Videira Lopes tén a cortesía de incluír como prezadísimo obsequio a edición de tres daquelas Cántigas de Santa María da autoría do Rei Sabio. Como valor acrecentado, a obra incorpora unha sección musical composta de melodías orixinais e contrafacta da cal é resposábel o primeiro musicólogo medievalista portugués, José Pedro Ferreira, quen tivo o gusto de imprimir en primeiro lugar as "Ondas do Mar de Vigo", o cal pódelle servir de moita axuda ás agrupacións corais nosas que aínda non teñen incorporado Martín Codax ao seu repertorio. A obra foi editada pola Biblioteca Nacional de Portugal, Instituto de Estudos Medievais e Centro de Estudos de Sociología e Estética Musical. A presentación tivo lugar na citada Biblioteca Nacional e o encargado do lanzamento académico foi o novelista, historiador da literatura e director do "Faro da Cultura" Xosé Ramón Pena. Colaboraron na presentación da obra magna de Graça Videira Lopes o ministro de Cultura do Goberno da República, e importante home de letras, Luis Filipe Castro Mendes e as máis altas autoridades culturais de Portugal. Dicíalles que, con moita frecuencia, as noticias non corren fluidamente entre Portugal e Galicia, e moito menos ao revés. A presente nota trata de ilustrar esta carencia. Certamente, días atrás as cántigas de Joan Zorro soaron acompasadas ás de Martín Codax. Ben.
