Se hai algún Alcalde cangueiro e singular ese é Pepe Chimé. Foise pero vai ser moi difícil vivir como se el non seguise estando connosco. A maiores dunha simpatía que enchía todo de alegría uníaselle unha xenerosidade sen límites.
Ben sabemos que non era un alcalde e un avogado politicamente correcto. Nin falta que facía, porque o que é máis certo é que sen el nada sería igual. Facilitou a liberdade de expresión, a participación popular sen límites, defendeu a veciñas e veciños en circunstancias nada fáciles nin cómodas e aínda que a súa posición férrea e firme só lle supuxese algún sensabor, pouco lle importou porque sempre soubo onde tiña que estar: á beira das persoas desfavorecidas e das que nada tiñan, por iso el lles daba todo.
Sabemos que nin sequera estas liñas lle farán graza ningunha porque nos diría que hai que seguir vivindo e loitando. E vivindo ben, porque a xente traballadora ten/temos dereito a vivir ben. Como lle dixo a aquel comandante da mariña nunhas Festas do Cristo, cando lle botaba na cara que lle gustaba vivir ben, Pepe Chimé contestou dun xeito tan irónico como alegre e intelixente: "É que eu son un comunista cinco estrelas".
Por iso hoxe tod@s queremos ser cinco estrelas. Unha maioría social que diante de treboadas e furacáns de inxustiza, latrocinio e corrupción, non nos imos render nin asustarnos, nin vendernos á dereita e a valores que humillan e esnaquizan a dignidade e a liberdade humana.
Camarada e irmán Pepe Chimé, nin ti nin Cangas camiñades sós. Aí está un pobo en marcha que nunca te traizoará. Con Pepe de referente Cangas seguirá a ser un pobo tan encantador como loitador pola dignidade e os dereitos de toda a Humanidade.
Grazas Chimé, nunca imos esquecer o que che debemos!
*Antonio González "Tucho Perete", Mariano Abalo, Euloxio López e Xosé Manuel Pazos. exalcaldes e alcalde de Cangas
