Segundo un informe reservado ao que este, seu, modesto cronista tivo a oportunidade de acceder, acontece que, de se celebraren agora mesmo eleccións xerais na República Bolivariana de Venezuela, velaí que Ciudadanos viría ser a formación que recollese un maior número de votos no país irmán, resultando ser a forza vencedora en cidades como Valencia, Barquisimeto, Maracay ou San Cristóbal, ben por enriba de Felipe González e o grupo Prisa; así mesmo, a formación laranxa triunfaría amplamente nos estados de Zulia, Falcón, Miranda e Apure, e apuntando ao máis alto no Distrito Capital e Barinas, á par de Eduardo Inda e Francisco Mahruenda. Como se bota de ver, todo que se di un exitazo; de certo, xa está demorando demasiado D. Mariano Rajoy en volver reunir o Consello Nacional de Seguridade!
Política ficción? Pura e dura brincadeira, retrucan? Pois pode que si e pode que non. E é que, de non ser digno de creto, daquela, o referido informe reservado..., o caso é que xa me dirán vostedes, pois, cal resulta ser de veras o obxectivo desa singular viaxe que D. Albert Rivera Díaz vén de efectuar á patria de Antonio José de Sucre, Simón Bolívar, Carlos "el chacal", Dayana Mendoza e/ou Hugo Chávez. E, a ver: quede pefectamente claro, tamén e desde xa, que o Sr. Rivera ten todo o dereito do mundo -faltaría máis- de acudir alí onde lle pete e lle pareza pertinente; ao fin e ao cabo, se outras xentes peregrinaron no seu día a terras caraqueñas en apoio, exaltación..., epifanía do chavismo, por que non habería de efectuar un semellante percorrido o noso personaxe na defensa e a aperta dos seus opositores? Dito/escrito ás bravas: cadaquén é moi libre de rascar onde lle vaia picar.
Agora ben; D. Albert Rivera non vén ser -por máis que forme parte de C´s- iso mesmo: un cidadán particular calquera. Ben polo contrario, trátase de alguén que pretende, nin máis nin menos, que acceder á Presidencia do Goberno español ou, no seu defecto, condicionar de forma decisiva as políticas seguidas por aqueloutro que chegue a ocupar tan alta maxistratura. Traducido: para alén de todas as xenerosas ofertas solidarias, máis aló das preocupacións humanitarias e da procura dos dereitos civís; fóra desoutra afección por aprender a bailar o joropo andino e/ou darlle a un "moradito" ou a un "parchita" en Illa Margatita, acontece que, entre as súa responsabilidades, o Sr. Rivera ten/comparte esa mesma de participar activamente no deseño, traxecto... pragmática da política exterior de España (iso si: se tal "hubiera/hubiese" realmente); xa que logo, a que curioso xogo estamos a xogar?
Contemplado desde esta beira do Atlántico, non cabe dúbida de que as terras de Bolívar non son/non poden devir un país calquera para nós; ben polo contrario, trátase dun espazo onde a presenza española amosa intereses de todo tipo e que cómpre cuidar, daquela, con especial atención e boa man. Isto é, talmente como sucede (debería suceder) con México, Arxentina, Uruguai, Cuba, Guatemala, Colombia, Ecuador, Perú..., o que aconteza/deixe de acontecer neses lugares non pode resultarnos alleo en ningún caso. Pois ben; precisamente por iso mesmo non deixan de causar abraio determinadas actitudes e comportamentos de parte dos políticos que nos representan/buscan representar como así mesmo do lado dalgúns (autoproclamados) creadores/líderes de opinión e medios de comunicación. E é que, a pouco que nos deteñamos a visionar algunha canle televisiva -a pública á cabeza, desde logo- e/ou a repasar as páxinas de certos xornais, poderemos comprobar doadamente como as noticias procedentes de Caracas non só é que interesen, preocupen e apaixoen por estes pagos, senón que chegan a ocupar. día si e día tamén, minutos e máis minutos de telediarios, debates, programas especiais.... como asemade de páxinas e páxinas de "internacional", "opinión", "reportaxe"... e, clave das claves, de "nacional". Tanta e tanta vén sendo a "venezolatine" que, ao paso que estamos, é moi probábel que "sociedade" se encargue de dar conta puntual do concurso para Miss Cumaná; que en "deportes" lle dediquen os seus titulares ás últimas fichaxes dos Criollitos de Tinaquillo e/ou dos Cimarrones de Yaracuy e, en fin, que a sección de "meteoroloxía" informe de nubes e claros, con chuvascos débiles ocasionais, para a fin de semana, en toda a Rexión de Los Llanos. Con dúas ou tres telenovelas en curso, xa só faltaría que D. Bertín Osborne -ese filósofo de garda e masterchef de luxo- nos ensine como incendiar por completo, plantarlle lume fatal a unha cociña de vitrocerámica en Maracaibo ao tempo que desafina "Alma llanera". Pero vaia; de certo que todo se andará.
Iso si; mentres tales cousas acontecen -ou están para acontecer- da outra beira do mar océano, continuamos sen noticias de Podemos-EU. E, se o plasma da Moncloa quere, tampouco de España.