Ante as declaracións vertidas recentemente en diferentes medios de comunicación polo actual rexedor do Concello de Ponte Caldelas, Andrés Díaz, sobre o crematorio San Marcos instalado no polígono empresarial de Ponte Caldelas, e sobre a miña persoa, véxome na obriga de aclarar varios asuntos.
En primeiro lugar, esixo ao alcalde de Ponte Caldelas que manteña o máximo respecto ante unha decisión xudicial, emitida polo Xulgado Contencioso Administrativo número 1 de Pontevedra, na que, lémbrolle, se confirma que a licenza de obra concedida á empresa Sepelios San Marcos SLU para a construción dun crematorio axustase plenamente a dereito.
Dita sentencia, emitida o pasado 31 de marzo, non ordena nin revocar a licenza concedida, nin sequera subsanar posible defectos que houbese na súa tramitación, pois toda ela axustouse á legalidade vixente.
Pola contra, nesta licenza se expresa que a empresa, que eu represento, aportou no seu día todos os permisos e informes que lle foron solicitados, incluída a autorización medioambiental preceptiva outorgada pola Xunta de Galicia.
A realidade está expresada no contido desta sentenza. O Concello de Ponte Caldelas posúe un polígono industrial no que está permitida a instalación de empresas para o desenvolvemento de actividades industriais, e a actividade dun crematorio non está prohibida.
Así mesmo, lémbrolle tamén ao actual rexedor municipal, que un principio básico do Dereito Administrativo preceptúa que a licenza é un acto regrado, de concesión regrada, estando as administracións públicas obrigadas a concedelas cando concorran os requisitos legais pertinentes.
E en segundo lugar, esíxolle ao señor Andrés Díaz respecto cara a miña persoa e cara a empresa que eu represento. Pois de xeito implícito, os seus lamentables argumentos vertidos nos últimos días supoñen tamén un ataque directo a Sepelios San Marcos SLU, e iso non se llo vou consentir.
Somos unha empresa solvente que nos últimos anos experimentou un proceso de expansión importante, permitíndonos aumentar o número de traballadores da nosa plantilla. Esíxolle respecto cara os traballadores desta empresa que estanse a ver tamén afectados ante esta situación. Esíxolle respecto aos clientes de Sepelios San Marcos SLU, que a diario trasládannos a súa incomprensión e o seu apoio ante un rexeitamento orquestrado polo actual rexedor de Ponte Caldelas.
En fin, esíxolle respecto, pois a sentencia é clara, nun polígono industrial, como é o de A Reigosa, está permitida a instalación dun crematorio, polo tanto, os argumentos esgrimidos polo actual rexedor dende as pasadas eleccións municipais eran tan só falacias e mentiras co pretexto de lograr un puñado de votos.
Á vista da sentencia queda claro que o señor Díaz estivo enganando e está a enganar aos veciños de Ponte Caldelas co único fin de manterse ao fronte da Alcaldía. A vía da calumnia dificilmente levará ao señor Díaz a bo porto, polo que sería conveniente que deixase de mentir e tivese a valentía de recoñecer ante todos que dende un primeiro momento sabía que a localización do crematorio era legal.
Non teño pensado acudir á vía xudicial, que podería, pois o meu dereito ao honor e á intimidade estanse a ver vulnerados ante as continuas difamacións vertidas por este señor. Simplemente queremos, dunha vez por todas, poñer fin a esta polémica xerada polo actual rexedor de Ponte Caldelas, e que á vista da sentencia emitida caeu polo seu propio peso.
Se ben podemos chegar a entender a postura dos veciños, obviamente non podemos compartila por razóns que atinxen ao noso proxecto empresarial.
Pero no caso do rexedor, é necesario que comece a ser serio neste asunto, pois agora mesmo, cos seus actos e a súa actitude, a palabra alcalde quédalle grande.
*Xerente Sepelios San Marcos SLU