Esperemos que as preguntas formuladas durante estes días atopen respostas nesta publicación, que pretende ser un instrumento práctico que axude a algúns representantes locais a buscar, na cooperación e o irmandamento, solucións aos numerosos desafíos aos cales deben enfrontarse, e a construír un pobo mellor para todos.
Tomando como base as relacións de amizade e confianza mutuas, os irmandamentos poden ser o punto de partida para intercambios de experiencias e enriquecemento mutuo en ámbitos moi diferentes. Así é como se han ir construíndo, a través dos irmandamentos, diferentes colaboracións en temas como o tratamento de residuos, a xestión das augas, o desenvolvemento económico, un achegamento entre os colectivos culturais, e sociais de ambos os pobos. Non cabe entender ningunha razón oculta, como proclaman algúns, no desexo común de ambos pobos.
Soamente tratamos de facer as cousas con toda a ilusión, tentando realizar os proxectos que son de todos e todas as veciñas e veciños de Bueu. Desde logo que nos equivocamos como casi todo o mundo, pero de ahí, a ver intereses ocultos nisto, é ter a mente moi retorta. Por que? Pola sinxela razón de que hai unha primeira vez para todo, desde logo Bueu ten infinidade de coincidencias con Ribadesella, unha delas é o enorme vínculo co mar. Creo sinceramente que é unha ocasión magnífica para resaltar o que nos une, que é moito e o positivo que resultará para todo o pobo poder compartir coa xente de Ribadesella, o que aquí temos.
Coa ampla oferta cultural, a nosa oferta en praias, a nosa gastronomía, dou por feito o inmenso atractivo que podemos ofrecer en Bueu e toda a comarca do Morrazo a todos os visitantes. Aínda que os cargos electos representan a vontade política, nun irmandamento tamén se debe involucrar ao resto dos veciños, as escolas, as asociacións deportivas, as escolas de música, asociacións empresariais etc, deben implicarse.
Din que galegos e asturianos, primos irmáns; pero xa se sabe que en toda familia sempre hai algún mal avenido. Prefiro quedarme con: galegos e asturianos, irmáns a secas. Gozar do Entroido, as máscaras usalas só estes días. Esfrutar del Antroxu, les mázcares usales solo estos díes.
P.D. Sinto a necesidade de acabar dicindo que síntome enormemente orgulloso de ser asturiano, por se algún non o sabe, pero dicir que é grazas a que o meu pai naceu en Bueu. O meu único interese é traballar por este pobo, terra dos meus fill@s, coa mesma ilusión e agarimo que o que sinto pola terra na que nacín.
*Fidel Castro é concelleiro de Relacións Institucionais de Bueu